"Tur miembro di parlamento mester haya tur informacion y e mester por lesa tur documento pa e por tuma un desicion responsabel riba tur tema. Esey ta e principio basico cu semper mester conta. Tur miembro di Parlamento mester ta bon informa. Pero esey no kier men cu e mester por bay cas cu e documentonan of cu e mester por saca copia di e documentonan." Asina Rene Herde', lider di e fraccion di AVP a splica e profedura cu a usa pa pone tur informacion tocante di e ley y e contractnan entre gobierno di Aruba, Valero y CITGO disponibel pa miembronan di Parlamento, pero sin cu nan por saca copia of bay cas cu e documentonan.

SECRECIA OF CONFIDENCIALIDAD
Rene Herde' a splica cu no tin niun documento cu Parlamento no por haya pa wak. Parlamento a haya tur documento cu tin, mescos cu Raad van Advies. Kier men cu no tin nada di sconde den esaki. Loke si tin ta acuerdonan entre gobierno di Aruba y e dos companianan priva, pa percura pa informacion priva di e companianan aki cu ta poni den e documentonan, no sali den publicidad. Ta e companianan priva VALERO y CITGO a indica cu nan no kier pa informacion di nan compania y nan operacion sali den publicidad. Esey gobierno y Parlamento mester respeta. Ta pa motibo di e informacion di e companianan aki cu ta den e documentonan, cu a sera e acuerdonan di confidencialidad. Esaki kier men cu ta percura pa esnan cu lesa e documentonan, no ta publica nada di e informacion di e companianan priva aki. Rene Herde': "Ami no tin nodi bay cas cu documento pa mi lesa y studia e documentonan. Gobierno y Parlamento a percura pa mi haya tur informacion cu tin, pa mi por tuma un desicion bon informa otro siman. Parlamento a percura pa tur documento y tur informacion ta disponibel pa mi. For di diamars tur informacion ta poni den biblioteca di Parlamento pa tur miembro por lesa. Ami no tin niun problema si un miembro di Parlamento kier trece un of mas consehero pa lesa e documentonan tampoco. E acceso mester ta completamente liber. Loke si mester preveni, ta cu informacion cu segun e companianan priva, VALERO y CITGO, ta informacion confidencial pa nan, no sali den publicidad." Rene Herde a sigui splica cu si laga miembronan di Parlamento bay cas cu e documentonan, no por garantisa cu informacion cu tin den e documentonan no ta sali riba Facebook of den corant. Esaki por causa problema serio cu e companianan priva. Rene Herde': "Nos no kier tuma niun riesgo cu e contractnan aki. E re-apertura di e refineria ta mucho importante pa Aruba, pa creasion di trabou, pa stimula economia, pa crea entrada pa famianan y pa gobierno. Nos no por laga nada stroba e re-apertura. Loke gobierno y Parlamento a haci ta sigura cu tur miembro di Parlamento ta haya tur informacion, sin cu ta core e riesgo cu informacion confidencial ta sali riba FaceBook of den prensa. Si cualkier miembro di Parlamento bisa cu e no por haya informacion, anto e motibo lo ta cu e no kier usa e oportunidad amplio cu ta dun'e henter un siman prome cu e reunion publico, pa lesa tur documento y haya tur informacion!

Expresionnan haci den e articulo aki no necesariamente ta refleha opinion di ArenaPoliti.co