Nos ta celebra e reapertura di e refineria pero di otro banda nos ta hopi preocupa. 

ORANJESTAD- Fraccion di MEP a tene conferencia di prensa na Gate di Valero pa enfoca riba e importancia di e reapertura di refineria.
Un reapertura di e refineria ta importante pa draai e economia di nos pais y ta reenforsa nos florin creando cuponan di empleo pa nos propio ciudadanonan y lo trece entradanan adicional den caha di Gobierno pa inverti den otro proyectonan cu ta hiba mas prioridad den nos pais.

Otro siman dialuna Parlamento lo trata e ley di CITGO y e reapertura di e refineria.
Manera ta conoci, Gobierno a nenga di duna Parlamento e documentonan di contracto cu a firma cu CITGO. Nos ta purbando pa haya tur documento pa asina nos studi’e y ta sigur cu esaki ta un deal cu di berdad ta conbini henter Aruba.

Fraccion di MEP sinembargo mester bisa cu di un banda nos tin hubilo pa cu e reapertura di e refineria pero di otro banda nos ta hopi preocupa.
E falta di transparencia di Gobierno cu desde principio a nenga di informa Parlamento y Pueblo debidamente riba e asunto aki no solamente a trece duda pero tambe hopi preocupacion.

* Ta reino preocupacionnan grandi den e trahadornan cu ainda ta traha na Valero kendenan ta preocupa pa nan derecho y beneficionan y kende lo bay paga nan.

* Nos tin tambe preopacionnan riba e tereno di medio ambiente. Ken ta bay paga pa haci e tereno di refineria limpi. Ken ta bay financia ful e proyecto. For di unda e placa ta bin pa financia y rehabilita ful e proyecto.

* Nos tin preocupacion riba e benta di jet fuel y di gasoline na nos gasoline stations locual tabata wordo haci pa Valero Marketing & Supply Aruba NV. Nos ta compronde cu Gobierno kier bende esaki na hendenan cerca di nan anto esaki ta algo cu nos lo no bay acepta.

Aunke parido MEP tin nos preocupacionnan, nos ta di hubilo pasobra e dia ta yegando mas cerca cu e refineria ta habri bek. Esaki ta un soño cu nunca nos a perde speranza den dje y cu nos kier wak wordo realisa pa asina nos por desaroya nos pais y trece un boost economico bek na San Nicolas.

Mientras cu e Gobierno di Mike Eman a perde speranza y a opta pa desmantela y a cera areglo caba pa cuminsa desmantelacion, MEP nunca a perde fe, speranza y confianza den e comunidad di San Nicolas. Apersar cu nos ta hopi preocupa, nos ta celebra e reapertura di e refineria.

Expresionnan haci den e articulo aki no necesariamente ta refleha opinion di ArenaPoliti.co