STA CRUZ - Aruba a biba bou menasa di orcan Mathew pa varios dia y awor nos por bisa cu realmente nos isla ta bendicion'a. Danki na Dios cu nos isla no a wordo afecta pa e orcan.
Mi kier gradisi un y tur cu a traha incansablemente pa alerta nos comunidad y pa yuda cu e preparacionnan necesario.
Ta momentonan asina nos ta sinja aprecia e sacrificio di tur esnan cu ta traha den equipo pa por atende cu calamidad, y di curason mi kier gradisi tur.

Den preparacion pa e orcan ami hunto cu hendenan di mi equipo a acudi na varios cas cu no tabata equipa pa atende cu e orcan. Nos por a mira pa nos mes un biaha mas cu tin hopi pobresa na Aruba. Casonan di pobresa extremo cu ta keda scondi te ora tin e menasa serio di por ehempel un orcan. Nos a purba yuda mas cu nos por na e momento ey, pero awor ta bin e pregunta: ken ta yuda tur e hendenan cu ta biba den pobresa extremo diariamente? Mayoria di nan a acudi na departamento di asunto social pa asistencia financiero manera bijstand, tambe nan a acudi na fundacion pa nos comunidad pa pakete di cuminda. Pero nan no ta bin na remarke pa ayudo (mas).
Tambe nos a encontra casonan di hendenan grandi cu ta biba nan so y ta hopi neglisha. Ami ta haya cu esaki ta un forma di abuso di nos grandinan.
Nos a purba duna un man mas tanto cu ta posibel y nos a cuminsa prepara pa por si acaso mester a habri nos Cede como un shelter. Pero danki Dios no tabata necesario pasobra e orcan no a afecta nos isla hopi.

Sinembargo e problema di pobresa si ta keda y e ta un problema serio cu mester wordo duna atencion. Gabinete Mike Eman ta constantemente bezig cu cosnan cosmetico, cosnan superficial, show pariba y pabow pero no ta brinda cabes na e problemanan real den nos comunidad. Nos ta spera cu desde oposicion nos por logra atende cu e problema ey, sino ta algo cu lo mester haya prioridad ora MEP ta bek den gobierno otro anja" lider di MEP Evelyn Wever-Croes a duna di conose.

Expresionnan haci den e articulo aki no necesariamente ta refleha opinion di ArenaPoliti.co