Refleccion riba Dia di nos Grandinan. 

STA CRUZ - Dia 1 di oktober ta e dia cu mundialmente nos ta observa dia di nos grandinan y dia di nos pensionadonan. "Riba e dia aki mi a probecha pa bishita hopi di nos grandinan y conbersa cu nan. Mi ta sinti cu nan ta e grupo mas lubida pa gabinete Mike Eman. Dicon?

CUIDO
Usualmente ora bo yega un cierto edad, bo mester di mas cuido. No solamente cuido medico pero tambe cuido tur dia. Hopi di nos grandinan kier sigi biba na nan cas, den nan ambiente, maske nan mester di mas atencion y cuido. Lamentablemente na Aruba nos no ta dunando prioridad na e cuido na cas di nos grandinan. Tampoco tin prioridad ta wordo duna na cuido di nos grandinan den casnan di cuido. Subsidio na casnan di cuido a wordo corta cu como consequencia cu mas hende tin cu keda riba e lista di espera. Tin cama y camber disponible, pero no tin subsidio pa mas empleado ni material pa e casnan di cuido tuma mas hende. Esey sigur ta lamentable pasobra e necesidad di cuido ta sigi crese pero gobierno no ta pone placa disponible pa brinda e cuido ey.
Esaki ta algo cu tin mi hopi preocupa y nos lo hasi tur lo posibel pa durante tratamento di presupuesto 2017, trese un alternativa.

FINANSAS
Un otro tema cu ta causa hopi preocupacion serca nos grandinan ta e tema financiero. Nan pensioen di biehes no ta yega pa cubri e gastonan esencial pa nan por biba. Apesar cu e fondo di pensioen di biehes awor ta solido, hasta por a regala Gabinete Mike Eman 61 miyon florin, toch ainda gobierno ta nenga pa aumenta e suma di pensioen.
E problemanan financiero ta bira mas alarmante cu tur e cobransanan di belasting cu nos grandinan ta ricibiendo ultimo temponan. E atraso na departamento di belasting ta causa cu ta despues cu un persona baha cu pensioen, e ta haya cantidad di cobransa biew. En bes cu e por gosa di su pensioen, e mester bai coba den su papelnan biew y bringa su derecho. Ta resulta cu den varios caso e debe no ta corecto of ela caduca caba. Tur esaki ta causa hopi panico serca nos grandinan y mester haya atencion di gobierno. Mi ta hasi tur lo posibel pa yuda especialmente nos pensionadonan cu nan problemanan cu belasting pasobra mi no por cu inhusticia asina. Locual lo sigi haya prioridad di MEP ta cu lo elimina belasting riba pensioen di biehes.

COMPROMISO DI MEP
Mi ta ripiti nos compromiso na nos grandinan: (1) baha costo di bida, (2) brinda nos grandinan cuido digno di salud (3) elimina belasting riba pensioen di biehez. Y desde oposicion nos lo lucha pa logra cumpli cu e compromisonan aki. Pasobra nos grandinan merece mihor" segun Evelyn Wever-Croes, lider di MEP.

Expresionnan haci den e articulo aki no necesariamente ta refleha opinion di ArenaPoliti.co