STA CRUZ - Lider di MEP Evelyn Wever-Croes ta mira atras riba un campanja di yena formulario di belasting hopi exitoso. "Den e ultimo dos simannan nos a yuda mas di mil persona na nos Cede. Un parti ta personanan cu ta bin cada anja pa nos yuda nan, nos clientenan fiel. Pero e anja aki tabata tin hopi cara nobo, di personanan cu pa prome biaha ta yega na nos Cede, pa nos yuda nan. Esey ta un senjal cu mas y mas hendenan ta haya confiansa den partido MEP. Mi ta gradisi cada un cu a deposita nan confiansa den nos pa yuda nan" lider di MEP a indica.

EXPERIENCIA DI 27 ANJA DEN BELASTING
Sra. Evelyn Wever-Croes ta un experto di belasting, cu mas di 27 anja di experiencia den belasting, y desde cu el'a drenta politica na 2009, el'a organisa e campanjanan di yenamento di formulario di belasting. "Tempo cu mi a traha na departamento di impuesto, mi a cuminsa cu e campanja pa yuda hende yena nan formulario di belasting. E tempo ey caba mi a realisa cuanto problema hendenan tabata tin cu yenamento di e formulario, y pesey nos a organisa e campanja pa yuda tur hende pa yen'e. Y mi mester bisa cu mi ta hopi orguyoso cu e hefenan despues di mi a continua cu e proyecto aki, pasobra e ta hopi importante. Mi tin awor 7 anja ta organisa esaki na nos Cede di MEP pasobra mi a realisa cu tin hendenan cu tin mas problema cu solamente yena e formulario, y no tur ora nan ta haya oportunidad pa splica tur nan problema na departamento di belasting. Semper mi a gusta yuda hende, y awor cu mi por combina esaki cu mi area di experticio, sigur mi lo sigi hasi'e".

PENSIONADONAN TIN HOPI PROBLEMA CU BELASTING
Locual ta resalta cada anja ta cuanto problema pensionadonan tin. "Mi tin hopi duele ora mi atende pensionadonan, pa mira cuanto problema nan ta haya nan aden. Hopi pensionado ta haya hopi cobransa biew parew debi cu departamento di belasting tin atrasonan. Pero di un pensioen e no por paga debenan di anjanan anterior facilmente. Pesey nos mester elimina e atrasonan cu urgencia. Tambe e hecho cu e pensioen ta cumula, y e ora e belasting ta bira un tarifa hopi mas halto. Pesey nos mester elimina belasting riba pensioen di biehes, pa asiba baha e peso di belasting for di nos pensionadonan.

Tur e proposicion y solucionnan aki ta parti di nos programa di partido 2017-2021, cu nos lo publica pronto. E proposocionnan aki ta muestra cu MEP ta prepara pa enfrenta e retonan grandi di nos pais. Nos tin e vision y nos tin e expertisio den cas pa logra esaki.

Expresionnan haci den e articulo aki no necesariamente ta refleha opinion di ArenaPoliti.co