Den rueda di prensa, e lider di Partido Democracia Real Andin Bikker, a bisa cu compara cu Hulanda e expectativa di bida di nos hendenan ta un tiki menos, y tin di nan prome cu yega e edad 65-70 no ta cu nos mas, después di a contribui pa decadanan cu e fondo di AOV esta pension.

Pesey e ta haya cu ta husto pa baha e edad di pension cu nan a calcula cu ta 60 aunke nan haya un tiki menos placa, pero ta preferible un tiki menos cu nada pa un tempo mas.

E ley di pension na Aruba aworaki, no tin e opción pa haya pension na e edad stipula y e grupo cu ta bayendo aworaki te edad di 65 ta birando mas grandi, pasobra cada seis luna tin un grupo nobo ta bayendo cu pension prome cu 65 ta relativamente chikito. Pues na dado momento ta bay haya cu personanan cu a nace na un cierto aña, ya caba ta bin na remarca cu nan ta bay haya te nan 65 y si no bin cu un opción manera PDR a presenta, ken sa si mañan netamente ora cu nan ta vislumbrando cinco aña prome cu nan baha cu pension, diripiente ta bin un demanda den e fondo di pension cu tin cu hise pa 67. Esaki si ta hopi fastioso y tin casonan cu a wordo hiba Corte, y según Bikker siman pasa mes un caso a wordo gana di un persona cu a anticipa riba un settlement cu a baha cu edad di pension, y e tempo ey nan a asumi cu e ta 60 y ningún hende por a premira cu tabata bin cu aumento di edad di pension, y Corte a dune razón. Asina tin mas caso di hende cu a haya nan mes den problema pasobra no a premira cu tin aumento di edad di pension.

Bikker a corda cu e tempo ey gobierno a haci un apelación na PDR tocante su amienda y a bisa cu den seis luna nan ta bay sinta cu sindicatonan pa haci un evaluación di e consecuencianan di ley y seis luna, dos aña a pasa bayendo pa tres y ningún evaluación a bini. Pesey PDR ta kere cu esnan cu ta apela pa baha e edad pa casonan relevante tin razón, y nan a laga un grupo di experto (Actuaris) haci un evaluación y calculación riba e dimensión aki, y PDR ta na spera di e resultado. Bikker a bisa cu na Hulanda e situación ta otro y cu expectativa di bida a aumenta cu tres luna y pesey nan a adapta e pension na esaki.

Expresionnan haci den e articulo aki no necesariamente ta refleha opinion di ArenaPoliti.co