ORANJESTAD- Diabierna den oranan di atardi Prome Minister Eman a reacciona riba retiro Otmar Oduber, kende un dia prome a entrega su carta di retiro na Gobernador di Aruba. Esaki despues di un periodo largo di tension, un periodo unda a trata na tur forma pa evita loke a sosode diahuebs, esta un kiebro. E kiebro a resulta inevitabel. Hecho ta cu e gobierno mester sigui cu su trabounan y Eman, den su calidad di lider di gobierno a anuncia cu tin dos candidato cu mester pasa ainda den e proceso di ‘screening’ prome nan por wordo huramenta como minister di Gabinete Eman II. Talentonan hoben cu Aruba mester pa sigui cu e trabou.

Eman a recorda cu den e prome periodo di gobernacion no tabatin e retonan grandi cu tin awor aki. "Den e di dos termino di gobernacion por a mira cu e relacion entre colega Oduber y demas coleganan a bira problematico. No ta busca e culpa cerca ningun hende, pero mester constata cu esaki tabata e caso. A pesar di tur esfuerso, toch no por a evita e kiebro." Prome Minister a splica cu e mainta ey, den Conseho di Minister, tur ocho minister tabatin un compromiso hopi firme pa sigui sostene e gabinete, mescos cu fraccion di partido AVP cu tambe ta dedica na e programa di gobernacion y partido. Eman a señala cu ultimo tempo e friccion semper tabata entre ex colega Oduber y un of mas di e otro ministernan. "Ami cu tabata e mediador mester constata awe cu entre Oduber y e otro shete ministernan cosnan no tabata funciona. Un situacion fastioso, un situacion di tension cu continuamente como mediador mi tabata trata na yega na un clima unda toch por a traha cu otro, pero esaki no a resulta. Al contrario, cosnan tabata bira cada dia mas dificil. Hecho ta keda tambe cu unda bo hinca energia den un solo situacion, bo tin menos tempo y energia pa dedica na otro asuntonan. " Eman a resalta cu ora bo tin un gobierno cu un mayoria absoluto den Staten, un situacion manera a presente ta mucho menos cu ora tin coalicionnan pa deal cu nan. "Nos por corda di antes cu practicamente tur siman tin algo, tabatin coalitieberaad pa discuti over ministernan cu no ta papia cu otro y otro friccionnan. Tres pa cuatro biaha pa aña tabatin crisis. "Si bo pone esaki den contexto di e trabou cu un Minister President tin pa tene Conseho di Minister riba un liña, riba un focus, riba un solo caminda, anto den e caso aki - pa fastioso cu e situacion por tabata pa mas di 10 luna largo - e ta menos fastioso cu ora bo tin cu deal cu un coalicion."

Pa loke ta liderazgo Eman tabata hopi cla y al caso. "Pa mi pone den termino general, e ultimo tempo nos a experencia tur e momentonan di tension y conflicto entre un solo minister cu un di e otro shete ministernan y tabata bira cada bes mas dificil pa convence shete minister pa traha den e situacion ey. E solo hecho cu nos por a sigui cu otro den un periodo di 10 luna despues di e bishita na gobernador di colega Oduber y bou di e condicionnan cu nos coleganan minister a expresa kico nan tabata sinti pa sigui traha cu e minister aki, mi ta kere cu sr. Oduber mester ta hopi contento cu mi liderazgo. Danki na e confiansa cu mi tin den mi coleganan y mi liderazgo cu mi por a pidi mi coleganan pa sigui traha cu nan colega, pasobra pa nan e punto cero a yega na januari caba."

Expresionnan haci den e articulo aki no necesariamente ta refleha opinion di ArenaPoliti.co