E MEGADEBE ta trece pobresa y cune hopi problema social cu ta duna criminalidad tur chens pa apodera di nos Pais. Nos Pais ta den caos y crisis debi na e señal robes cu e propio gobernantenan di Gabinete Eman ta mandando pa nos sociedad. Pasobra na momento cu bo ta hiba un maneho cu ta crea espacio pa criminalidad crece, bo ta crea caos y crisis. 

Señal robes di nos ministernan 
Caos y crisis ta wordo crea na bo Pais ora esnan cu ta den e pocicionnan di mas halto di bo Pais ta manda e señal robes na e sociedad cu criminalidad ta ok. Pasobra ta ki señal nos Minister President Eman ta manda ora cu e ta deal cu Kiko Gomez kende a wordo sentencia pa traficacion ilegal di arma, droga y hasta asesinato? Ki señal nos Minister Otmar ta manda ora e ta deal cu Ospino kende a wordo deteni pa traficacion ilegal di arma y riba dje a tira un atraco arma den dia cla den zona turistico di nos Pais? Ta ki señal Minister Sevinger ta manda ora cu bou su wowonan y halanan permiso ta wordo duna na hende riba lista di CIA pa por permanece na nos Pais? Ta ki señal Minister Sevinger ta manda ora e ta duna dezerzijds akkoord na Rincon kende ta deteni bou sospecho di a soborna ehecutivonan di PDVSA? Ki señal ta wordo manda pa Minister Sevinger ora cu e ta previligia un solo famia cu mas di 90.000 metro cuadra di tereno? Y mas cu claro, ki señal Minister Dowers ta duna ora cu e ta keda sin haci nada y djies sinta wak con su coleganan ta anda cu hende cuestionabel, cu mas cu 11 mil dollar di fondo publico ta bay na un proyecto fantasma di strawberry y su colega ta permiti pa hende riba lista di CIA haya permiso pa keda nos Pais? Ta esakinan ta e señal robes cu ta wordo manda na nos sociedad cu ta pone cu criminalnan ta perde tur berguensa y ta haci deshaci na nos Pais.

Aruba mester orden y respet
E gobernacion na nos Pais no por sigi degenera mas na man di Gabinete Eman. Ta yega ora cu nos Pueblo mester por conta cu su Gobierno ta pone orden den e caos cu ta reina y ta planta respet bek den nos sociedad. Pueblo no por keda duna sosten na mandatarionan cu ta manda e señal robes cu criminalidad ta ok. E ta den Pueblo su man pa saca nos Pais di e caos y crisis cu Minister Eman y su bende a hinca nos aden. Ban brinda Aruba e oportunidad di por conta atrobe cu e orden y respet cu nos merece pa por biba un bida digno na nos propio Pais. Rechasa e maneho di Gabinete Eman y manda e señal cu nos no kier e caos y crisis cu nan a hinca Aruba aden.

12 oktober 2016

Expresionnan haci den e articulo aki no necesariamente ta refleha opinion di ArenaPoliti.co