Awe MEP ta recorda cu 19 aña pasa un baluarte fiel di nos partido a bay laga nos, esta ing. Roland Lacle. Tabata na aña 1971, esta na e momento cu Betico Croes a dicidi di forma su propio partido, Roland Lacle tabata un di e promenan cu a uni su mes y asina a bira co-fundador di MEP. Roland a aparece riba lista di MEP for di 1971 te cu 1993 demostrando asina su lealtad na nos partido. 

Roland a lucha schouder cu schouder cu Betico Croes pa nos Status Aparte desde e inicio di e lucha te ora cu e Conferencia di Mesa Rondo a conclui exitosamente na maart 1983. Como politico y gobernante Roland tabatin un trayectorio impresionante y a ocupa practicamente tur funcion gubernamental na Antiyas y Aruba. E tabata miembro di Eilandsraad di Aruba, miembro di Staten di Antiyas, diputado di Aruba, Ministro Plenipotenciario Interino pa Antiyas y alavez Representante di Antiyas Hulandes den Mercado Comun Europeo, Ministro di Trafico y Comunicacion di Antiyas. Pa pais Aruba e tabata miembro di Parlamento, Ministro Plenipotenciario y Ministro di Finanzas. Tambe Roland pa varios aña tabata Presidente di MEP. 

Lamentablemente dia 12 di oktober 1997 Roland Lacle a bay laga nos despues cu el a keda hopi aña sufriendo di un quebrante di salud. Como reconocemento na e gran Arubiano aki, Gabinete Oduber a duna e caretera principal dilanti di Hospital bieu, sigui y pasa te dilanti su cas na Paradera e nomber di “Caya Ing. Roland Lacle” y p’asina tene su memoria bibo den comunidad.

Su espirito di lucha, su lealtad incondicional na partido MEP y su stimacion pa Aruba lo keda semper wordo recorda.

Expresionnan haci den e articulo aki no necesariamente ta refleha opinion di ArenaPoliti.co