Diasabra awor 22 di oktober 2016 lo bay tin un fiesta grandi na Carnival Village na San Nicolas pa celebra atrobe un biaha mas e deal cu gobierno di Aruba a cera cu Citgo y Valero. Un deal cu a bay cu un aprobacion casi unanime di Parlamento. Esaki ta ponemi corda riba e refran di e Romanonan: "pa tene e pueblo contento dunanan pan y fiesta"!!!!
Na mes momento e relacion entre Hulanda y Aruba ta mustra atrobe di ta uno keto bay den deterioro. Esaki a bin ta tuma lugar desde e welga di hamber di sr. Eman. Un welga cu a culmina den un KB y tambe introduccion di CAft, señalando asina e desconfiansa di parti di gobierno y parlamento Hulandes pa cu e forma descontrola y corupto di goberna dor di e gabinete Mike Eman I y II.

Pero e problema pa nos Isla no a caba aki. Sr. Eman hunto cu minister Sevinger a haña ta bon pa bay reinforsa nan sentido di masochismo ora a tuma vuelo bay Hulanda e siman aki. Cu dos man habri, nan a acepta e humiyacion di e gobierno di Reino pa cu nombramento di un gobernador pa Aruba. A dobla rabo meimei di pia y a logra un declaracion di parti di Plasterk cu e procedura cu a ser hiba, no a gana un premio di beyeza, pero sorry, e nombracion ta keda pa loke e ta. Y ainda falta, pasobra ata e miembronan di Tweede Kamer a duna ministro Plasterk "opdracht" pa bay evalua con pa get rid di e islanan Aruba, Corsou y St. Maarten cerca Nacionnan Uni. E mesun Nacionnan Uni cu tabata testigo con sr. Eman a core campaña pisa pa logra un asiento den e Veiligheidsraad pa Hulanda.
Apesar cu sr. Eman no a acerca Parlamento den e asunto di gobernador aki, UPP ta sinti cu Parlamento di Aruba atrobe a bolbe faya. Un intermediacion di parti di Parlamento, por lo menos di oposicion lo tabata na su lugar, pa evita cu nos como Aruba por a haci un mal beurt dilanti politiek Den Haag y e pueblo Hulandes. Sigur si nos mira e reaccionnan. Nos ta kere cu Parlamento mester a haci un intento pa pidi gobierno di Hulanda y sr. Plasterk duna Parlamento un chens pa papia cu sr. Eman prome. Hunto Parlamento di Aruba y gobierno lo tabata tin e oportunidad pa hustamente fortifica e posicion autonomo di Aruba den Reino. Tabata un custumber cu a wordo regla den palabracionnan di Conseho di Minister di Reino, cu Hulanda a trapa riba dje. Na mes momento e zet aki lo por a pecura pa acontesimento- y desaroyonan intransparente asina no tuma lugar. Y asina esaki juist evita e division cu nos tin den nos comunidad.

Awor tur esaki nos por wak como politikeria di parti di Hulanda, pasobra after all Aruba tin e derecho di autodeterminacion. Pero e realidad actual cu binimento di Citgo na Aruba, por haci cu por tin un full otro scenario. Ya durante di e presentacion oficial na porta di entrada di e refineria of e mehorador, por a scucha sr. Luongo ta haci algun expresion encuanto estrecha lasonan entre Aruba y Venezuela. A referi entre otro na binimento di e ferry for di Venezuela, cu por cierto ta den man di un persona hopi liga na e partido na mando na Venezuela. Hunto cu esaki nos mester tene cuenta tambe cu e denuncia haci door di Camara di Comercio encuanto bendemento di N.V.’s na comerciantenan venezolano y otro stromannan.

Si enberdad Hulanda kier deshaci di nos y na e mesun momento comerciantenan, probablemente liga na Chavismo logra di envadi nos isla, despues cu e partidonan opositor tuma e poder over na Venezuela (y e chens ey ta grandi), lo por bay existi e posibilidad cu den un futuro cercano nos isla lo por bira un escondite pa esnan cu probablemente lo ser busca door di e gobernantenan nobo. Consecuentemente esaki sigur lo ta desastroso pa Aruba. Den e situacion vunerabel cu nos a ser hinca for di fin di 2009 door di un gobierno maligno, Aruba por ta un "prooi" pa cai den man di Venezuela??

Awor aki tin un vacuum grandi di poder riba Aruba dor di un gobierno cu a perde tur crediblidad y parce ta wordo dirigi door di amigonan cu a inverti grandemente den e campañanan electoral. Nos a cuminsa perde nos autonomia y nos dignidad como pueblo. Y e pueblo lo sinta man cruza? Lagando politiconan hulandes, grandemente ayuda dor di e gobierno actual di Mike Eman, kere cu nan por hunga cu nos Pais na nan antoho? Loke na su turno por desemboca den un situacion super peligroso pa nos pueblo??

Ta p'esey UPP ta kere cu nos ta na un cruzada na unda e pueblo Aruba mester dicidi su propio destino. Esaki na un manera civico y sereno y no den e situacion cu nos ta awor. Na unda nos tin un pueblo super dividi. Y UPP ta convenci cu cambia e rumbo di un destino desastroso pa hasie uno prospero y briyante pa nos pueblo NO mester ta dificil. Nos no por laga otronan dicidi pa nos. Nos NO por laga otronan dicidi pa nos ki dia nos ta bira independiente. Nos pueblo no merece esey. Ta p'esey cu UPP ta bisa un biaha mas cu a bira tempo pa UNI pa introduccion di reglanan di Good Governance, nos pueblo merece un gobierno cu ta mantene su mes na reglanan di bon gobernacion. Asina ey so nos lo por logra cu lo tin respet pa Aruba no den Reino so pero pafo tambe. Asina aki SO nos no ta corre e riesgo di cay den un vacuum cu por tin consequencia desagradabel y indesea pa Aruba y nos pueblo.


Partido UPP
Booshi Wever
19 oktober 2016

Expresionnan haci den e articulo aki no necesariamente ta refleha opinion di ArenaPoliti.co