Fraccion di AVP: MEP no a ni lesa e presupuesto
Despues di dos dia di tratamento di presupuesto a sali na cla cu e miembronan di e fraccion di MEP no a lesa e presupuesto. Na mas cu un ocasion e miembronan di e fraccion di MEP a referi na cifranan cu no ta corecto. Por ehempel: un miembro di MEP a referi na e aumento di e presupuesto di husticia cu apenas 300 mil florin. En realidad e presupuesto di polis so caba a aumenta cu 3 miyon florin.
MEP a usa e mes un analisis di aña pasa y a presenta e mes un graficonan di aña pasa, sin tene cuenta cu e presupuesto nobo. Sr Marlon Sneek di e fraccion di AVP a mustra cu cifranan di e presupuesto 2017, cu e ponencia y conclusionnan di MEP ta incorecto.
Niun di e miembronan di e fraccion di MEP a referi na e presupuesto of na e consehonan riba e presupuesto. Temanan essencial manera e reduccion di deficit, e efectonan di e apertura di e refineria, e reduccion di debe, etc. no a haya niun atencion di e miembronan di partido MEP. E miembronan di e fraccion di MEP cu semper ta haci uso exclusivamente di e consehonan di Conseho Consultativo (Raad van Advies) y di CFT/CAFT, e biaha a no a ni menciona e raportnan aki. Parlamento a haci mas o menos 900 pregunta scirbi na gobierno riba e presupuesto 2017 y e maneho di gobierno. Hopi di e preguntanan di e fraccion di MEP tabata preguntanan cu nan a yega di haci den añanan pasa. Nan a djis "recycle" e preguntanan. Tur esaki ta mustra cu majoria di e 7 miembronan di e fraccion di MEP no a ni lesa e presupuesto.
AVP
E contraste cu e fraccion di AVP atrobe ta grandi. Anto esey ta mientras cu e fraccion di AVP a limita e cantidad di orador pa cada ministerio. AVP a prepara pa trata e presupuesto den ceno di e fraccion y a reparti e oradornan over di e ministerionan. Esey a haci cu cada miembro a specialisa y prepara pa un of mas ministerio. Den e debate den Parlamento esey ta keda demostra.
Expresionnan haci den e articulo aki no necesariamente ta refleha opinion di ArenaPoliti.co