Banco Central: “State of the Economy” di dos trimester di 2016
Awe Banco Central di Aruba (BCA) ta publica e asina yama “State of the Economy” pa e di dos trimester di 2016. E publicacion aki ta provee un sinopsis di e desaroyonan economico local y internacional pa e prome mitar di aña. E puntonan mas importante ta wordo presenta abou, incluyendo un resumen di e indicadornan economico principal.
Den e prome seis lunanan di 2016, e actividadnan economico ta aparece di a desminui significantemente. Producto Bruto Domestico (PBD) den termino real, manera calcula pa BCA, a mengua cu 1,6 porciento debi na exportacion di turismo mas abou, un clima di inversion mas modera y consumo domestico modesto.
Ingreso turistico, manera registra den e balansa di pago, a baha cu 1,0 porciento, contrario na un subida di 5,3 porciento den e mesun periodo di 2015. Esaki por ta relata na e cambio den e tendencia optimista di e mercado Venezolano cu tabata evidente durante e ultimo cinco añanan.
Consumo a baha compara cu e aña anterior manera ta refleha den e reduccion substancial di e entradanan di BBO. Ademas, e consumidornan a keda pesimista durante e prome mitar di 2016, apesar di un leve mehoracion di confiansa na final di Juni 2016.
E nivel general di prijs a continua su tendencia descendente, pusha mas abou door di prijs di gasoline y tarifa di electricidad mas abou compara cu e mesun periodo di e aña anterior, resultando den un deflacion di 0,6 porciento den e promedio anual di e tasa di inflacion na final di Juni 2016. Riba un nota positivo, e deflacion a contribui na un mehoracion den e tasa di cambio efectivo real di e florin Arubano compara cu e valuta (e dollar) di su partner comercial principal, esta Merca.
Entrada di gobierno a subi cu 0,7 porciento durante e periodo bou di analisis, primordialmente door di entradanan substantialmente mas halto di belasting riba entrada y ganashi, como tambe belasting riba propiedad. Intensificacion den esfuersonan di e departamento di impuesto pa reduci e retraso den belasting a contribui na e crecemento aki.
E cantidad di placa den circulacion a subi cu Afl. 266,3 miyon na fin di Juni 2016 compara cu fin di December 2015, debi na un entrada neto di divisa (Afl. 345,5 miyon), mientras cu e activo domestico neto a mengua cu Afl. 79,2 miyon.
Mirando e fundamentonan economico y e cobertura adecua di lunanan di pagonan riba e cuenta coriente, cu a ser manteni durante e periodo di analysis, e posicion monetario di BCA a permanace sin cambio y e “reserve requirement” a keda na 11 porciento durante e prome mitar di 2016.
Download aki pa download e publicacion completo.
E publicacion completo [tambe] ta disponibel riba BCA su website (www.cbaruba.org).
E publicacion completo [tambe] ta disponibel riba BCA su website (www.cbaruba.org).
Expresionnan haci den e articulo aki no necesariamente ta refleha opinion di ArenaPoliti.co