Durante e reunion publico pa trata e presupuesto di Ministerio di Economia y Medio Ambiente, nos a atende Minister De Meza riba e situacion na e dump na Parkietenbos cu a bay completamente for di sla. E sero di sushi ta sigi crece y e huma ta keda afecta e habitantenan di e vicendario. A warda 7 aña pa un solucion, pero Gabinete Eman no a percura pa esaki cu e consecuencia cu hopi hende a keda perhudica. Ta parce manera cu Minister De Meza y su otro colleganan di Gabinete Eman a lubida cu e habitantenan di Parkietenbos y vecindario tambe tin derecho di biba un bida trankil.

Gobierno ta actua contra derecho humano
Nos a mustra Minister De Meza cu e manera cu Gabinete Eman ta anda cu e situacion di e dump na Parkietenbos ta contra e derecho humano di esnan biba den e vecindario di dump, cu ta ancra den articulo 2 di e Tratado Europeo di Derecho Humano, cual ta e derecho di bida. Esaki nos a ilustra na man di un caso cu a tuma lugar na Turkia, Öneryildiz vs Turkey, na unda cu e gobierno a faya di atende cu e dump debidamente te na e extremo cu a bin un explosion di gas cu a perhudica esnan biba riba y banda di e dump. Corte Europeo a dicta cu un gobierno mester percura pa evita cu un dump ta bira peligroso pa bida di hende y mester cumpli na informa e vecindario ta na ki tipo di peliger nan ta exponi. E gobierno no por deha di actua door di just bisa cu e no tin fondo suficiente. Den caso cu e peligernan manifesta nan mes, mester compensa e danio sufri. Y den caso cu gobierno deha na un manera extremo, esnan responsabel mester por wordo persigi y penalisa pa a actua contra e derecho di bida di esnan cu a wordo perhudica.

A sabotia un proyecto sin bin cu solucion
E Gobierno di MEP a percura pa bin cu un solucion na dump pa comberti e sushi den fluff. Di e manera aki kier a evita pa e sero di sushi keda crece y mas importante, pa evita cu ta bin candela na dump cu ta produci gas toxico cu ta bay den e aire di e vecindario di dump. Pero Gabinete Eman a sabotia e proyecto aki y na su lugar no a bin cu un solucion pa 7 aña largo . A consecuencia di a deha di e forma aki, awe e sero di sushi ta haltisimo te cu sushi ta cay na lama, cada ves tin candela riba dump cu ta yena gas toxico den aire y e molester di muskita y otro bestia ta keda trece malesa y molester pa e vecindario. Tin explosion tambe ta tuma lugar di e gas cu ta acomula den e sero di sushi y e chens pa bin un explosion mas grandi ta uno real. Pero mas tristo ta cu hopi habitante di e vecindario nan salud ta na peliger, na unda cu tin caso di cancer y tambe di asthma. E calidad di bida di e habitantenan ta bay atras cada dia cu no tin un solucion pa e dump cu a bay for di man na man di Gabinete Eman.

Haci mofa no ta e solucion
Nos a atende Minister De Meza riba e responsabilidad cu e tin como mandatario encarga cu e dump aki y nos a pidi’e via un mocion pa entrega na Parlamento dentro di un luna un plan cu e solucion pa e problema na dump y pa indica tambe con lo sanea esaki. Parlamento ainda no a vota riba e mocion aki. Pero ta di lamenta cu Parlamentarionan di AVP y hasta e propio Minister de Meza a scohe pa haci mofa di e situacion penoso y e preocupacion real cu nos a trece dilanti. Nan kier scapa cara dor di bisa cu ta un problema di hopi decada. Y tristo ta cu nan no a mustra ningun interes pa e hecho cu nan falta di accion ta pone cu awe hopi hende ta perhudica. Nan mester realisa cu e habitantenan di Parkietenbos y vecindario tambe tin derecho di biba un bida trankil.

Expresionnan haci den e articulo aki no necesariamente ta refleha opinion di ArenaPoliti.co