Aruba tin 7 aña ta warda riba un solucion pa e dump na Parkietenbos. Un solucion presenta pa e Gobierno di MEP pa reduci e volumen di sushi y paga e candela na dump a wordo sabotea na grandi door di AVP. Pero awe cu e sero di sushi no por crece mas y cu e dump ta un molester grandisimo pa e vecidendario, Gabinete Eman no por keda colga mas na saya di MEP y mester por presenta e solucion cu nan a bisa cu nan tin. Durante e tratamento di Presupuesto 2017 nos a atende e asunto aki cu Minister De Meza encarga cu medio ambiente y nos a presenta un mocion pa Gobierno dentro di un luna presenta un plan integral na Parlamento cu ta contene e solucion pa e problema di e dump na Parkietenbos.

No a dedica ningun atencion riba e dump den Presupuesto
Gabinete Eman ta gaba cu e ta un gobierno berde y sostenibel, pero ora ta toca medio ambiente, e gobierno aki ta laga hopi di desea. E problema na nos dump na Parkietenbos no ta di awor, pero asina mes e gobierno di asignatura berde no a dedica ningun atencion na esaki. Den Presupuesto 2017 no tin ni sikiera un frase pa bisa kiko Gabinete Eman su solucion ta pa e problema aki y con y dentro di cuanto tempo lo implementa un solucion pa e dump.

Mocion pa un plan integral wordo presenta
Nos di Fraccion di MEP a entrega un mocion pa asina Gabinete Eman entrega na Parlamento un plan di accion con lo atende cu e problema di desperdicio di sushi na Parkietenbos y presenta esaki dentro di un luna na Parlamento. Ta di spera cu e mayoria di AVP den Parlamento tambe mira e urgencia y necesidad pa e accion aki di parti di gobierno y pa nan brinda nan apoyo pa e mocion aki por wordo acepta unanimamente pa Parlamento di Aruba.

Claridad y seguridad pa Serlimar
Den e mocion aki nos a pidi gobierno pa ancra aden tambe e papel cu Serlimar lo desplega den e solucion presenta. Mester brinda claridad y seguridad na e empleodonan di Serlimar tambe ya cu tin indicacion fuerte cu e solucion di Gabinete Eman ta pa laga un otro compania priva procesa e sushi. Den un scenario asina e trahadornan di Serlimar na e dump na Parkietenbos tin derecho pa haya sa kiko lo pasa cu nan seguridad di trabou.

Actua contra derecho humano
Den e consideracion di e mocion nos a corda Gabinete Eman cu segun Corte Europeo Di Derecho Humano, Gobierno mester tuma medida pa evita tur peliger pa e bida di hende, incluso ora ta trata peliger relata na nos medio ambiente. Locual ta pasando na e dump na Parkietenbos a bay completamente for di man y ta contra e derecho humano di bida di esnan biba den vecindario di e dump. Nos no por keda warda mas pa busca un solucion. Gabinete Eman tin e obligacion pa presenta un solucion, ya cu cada dia cu pasa e bida di e habitantenan di Parkietenbos y vecindario ta core peliger.

13 september 2016

Expresionnan haci den e articulo aki no necesariamente ta refleha opinion di ArenaPoliti.co