Den un entrevista Parlamentario pa Partido MEP, sr. Guillfred Besaril, a elabora riba e situacion di infrastructura y trafico peligroso cu tin den e bario di Rooi Koochi, Savaneta. Sr. Besaril a declara lo siguiente: 

"Recientemente a sircula riba rednan social (Facebook) algun potret pa ilustra e situacion caotico cu tin den Savaneta, muy en especial e bario di Rooi Koochi. E habitantenan ta rabia y no ta compronde con por ta posibel cu ta planifica trabou grandi riba e infrastructura di e caminda principal cu ta pasa den Savaneta y na mes momento ta ehecuta un proyecto igual di grandi riba e camindanan secundario cu ta core parti paden di e bario. Esaki ta trece cune un congestion pisa di trafico - den ambos direccion - una bez cu yega Savaneta. 

Prome tabata e caretera cu ta pasa den Mabon, Brasil. Un caretera cu su ehecucion tabata un desastre completo! Na final e habitantenan di e bario ta remarca cu e caminda a keda practicamente mes malo cu prome cu a dicidi na cambia e capa di asfalt. Awor ta e caretera cu ta conecta Rooi Koochi, Seroe Alejandro y Yaraweg cu otro. E proyecto ta andando pa casi 3 luna caba y den e ultimo dianan a yega un punto den cual hasta e suministro di awa a ser afecta na 3 pa 4 ocasion. Y no ta solamente e suministro di awa. Na dos ocasion e bario a hasta lanta sin coriente, tur pa motibo di trabou nan andando riba e caretera. Pues e disgusto den bario ta totalmente cromprendibel!

Pa colmo tin diferente parti di e caretera cu a wordo coba di tal manera pa e contractor cu ta ehecutando e proyecto, cu si bo ta un persona cu no ta conoci cu e situacion di e careteranan, facilmente bo lo cai den un diferencia entre e caminda y na unda cu a keda coba cu ta superior na 50 centimeter. Cualkier auto di famia por sufri dañonan considerabel pa motibo di e situacion aki. Pregunta grandi ta keda: "Ken lo para responsabel pa e daño den caso cu esaki sucede?"

Habitantenan di Rooi Koochi ta enfrenta dia 'den, dia afo un situacion cu derepente ta wordo coba di tal manera dilanti di nan cas cu sea nan no sa con pa sali of sea no sa con pa drenta mas, na momento di mester hasi uzo di nan vehiculo pa bai labora of hasi nan respondinan. Tin cu te hasta ta puntra si cu truck mester cuminsa core den Savaneta, paso ni Bus ta pasa mas den e parti paden di e bario!

E habitantenan ta exigi claridad, pero mas cu esey ta exigi seriedad na momento di planifica proyectonan mane ta e caso den e bario di Savaneta. E planificacion ta nada profesional y ta trece demaciado inconveniencia cune. Di berdad Rooi Koochi ta HARTA!" Parlamentario Besaril a termina.

Expresionnan haci den e articulo aki no necesariamente ta refleha opinion di ArenaPoliti.co