ORANJESTAD – Hopi satisfecho Prome Minister Mike Eman tabata pa e avance di e trabounan andando pa construccion di edificio MFA na Savaneta. “Esaki tabata algo cu Savaneta y su poblacion merece,” e mandatario a expresa despues di a combersa cu trahandonan riba avance di e proyecto.

Realisacion di construccion di edificio MFA Savaneta ta den su fase inicial, mientras cu esun di Noord ta den uzo y esun di Paradera ta practicamente cla. Gabinete Mike Eman a planea construccion di cinco edificio MFA den areanan strategico rond Aruba. Awor ta evaluando uno pa Dakota tambe, segun e mandatario a bisa den un declaracion na e sitio.

Un MFA na Savaneta ta necesario pa mehora calidad di bida di e ciudadanonan, loke ta vision di Gabinete Mike Eman. “Nos ta orguyoso di tur e MFA-nan y contento cu Savaneta ta yega na turno pa conoce un mehoracion di calidad di bida en general di e desaroyo rond di e area residencial di Savaneta. Ta mas cu husto cu un bario ta conoce e tipo di cambionan cu nos Gobierno a pone como prioridad, tanto pa loke ta servicio den e bario como infrastructura.” Manera ta conoci, Green Corridor ta pasa den e area di Savaneta tambe y ta encera un cambio grandi den e caminda y e partinan na banda. “Green Corridor no ta un avenida so, pasobra e areanan entre e casnan tambe lo wordo drecha. MFA ta forma parti di e vision aki di mehora e servicio y calidad di bida pa nos hendenan den tur bario.”

E mandatario a recorda cu pa hopi aña tin e Oficinanan Auxiliar di Gobierno den barionan, pero e edificionan den cual e servicio aki ta wordo brinda no tabata adecuado ni pa e cliente ni pa e trahadonan. Esaki combina cu e necesidad di mas espacio pa habitantenan di bario por topa otro of recrea a haci cu a bini cu edificionan multifuncional. Esun di Savaneta ta na e punto pa basha e vloer pa cuminsa lanta e edificio. E mandatario ta spera cu den menos di un aña MFA di Savaneta por keda inaugura. E lo wordo dedica na un gran personahe di e bario, kende a dedica su bida na folklore y cultura di e bario. “Nos ta haya importante cu cada un di e MFA-nan refleha tambe e ambiente y espirito di cada bario. Logicamente esaki ta keda personifica den personanan cu a haci un diferencia pa nan bario y Aruba.”

Tabatin hopi elogio pa e trabou di arkitecto Thijsen y trahadonan di Custom Contractors NV cu ta encarga cu e construccion.

Lo bay tin diferente servicio di Gobierno cu lo wordo brinda den e MFA, ademas di espacio cu por wordo uza door di fundacion of organisacionnan di e bario, y door di hubentud. Bisiñanan ta hopi contento  "Tabata mas cu husto cu Savaneta ta haya un bunita edificio di Gobernacion, unda cu antencion pa ciudadanonan di Savaneta ta grandi. Loke ta parti di e vision di Gobierno pa un miho calidad di bida pa nos hendenan.”

Expresionnan haci den e articulo aki no necesariamente ta refleha opinion di ArenaPoliti.co