A basha ringbalk di edificio MFA na Savaneta. 

ORANJESTAD – Pa Gabinete Mike Eman mehoracion di calidad di bida ta un logro cada bes cu e edificionan di MFA- yega un fase nobo. MFA-Noord ta den operacion pa mas cu un aña caba, MFA Paradera a keda cla y yabi a wordo entrega e siman aki, MFA Savaneta a yega ringbalk di e prome piso y MFA Sta Cruz ta bay destaho otro luna pa construccion cuminsa despues, mientras cu esun di San Nicolas tambe ta yegando e fase di destaho publico denter di corto tempo.

E concepto aki ta parti di un vision amplio pa Aruba cu Gabinete Mike Eman a traha riba dje. Prome Minister Mike Eman, ta hopi envolvi cu e proyectonan durante cada fase di nan desaroyo y tabata presente na momento cu a basha ringbalk di MFA Savaneta diaranson ultimo. E mandatario a expresa e orguyo grandi cu Gobierno ta sinti cu servicio na comunidad, por medio di Hulpbestuurskantoornan (HBK), ta wordo mehora di e forma aki y alabes amplia esaki cu mas servicio den e barionan. Ultimo añanan ya caba por a constata un aumento di fluho di trafico na e HBK-nan ora cu a amplia e servicionan eynan.

Arkitecto Serge Thijsen y su compania Thijsen Engineering NV y e compania di construccion Custom Contractors NV a haya e confiansa pa diseña y construi e edificio moderno pa e bario di Savaneta. Un edificio cu ta un acomodacon multifuncional unda cu no solamente tin servicio di HBK pero tambe servicio di Impuesto y AZV combina cu un Biblioteca cu computer pa e habitantenan, cu e meta pa mehora calidad di bida. “For di prome instante nos a bisa cu no ta solamente un caretera di 4 via nos kier crea pa mehora calidad di bida di nos ciudadanonan, pero tambe mehora e espacionan publico.” Asina Prome Minister a menciona e proyecto di Green Corridor cu no ta solamente e caminda, pero espacionan publico cu ta wordo embeyece cu parkenan di recreacion of deporte tambe ta necesario. Den e vision total un MFA hunto cu tur e mehoracion di infrastructura pa e barionan ta e enfoke cu Gobierno ta poniendo cada bes pa mustra con ta creando un pais sostenibel. “Mi ta hopi orguyoso di por mira con institutonan manera IMF y World Bank cu tabata papia otro idioma algun aña pasa, awe ta papia di importancia di un ekilibrio husto di reparticion di bienesnan. No ta husto pa esnan di menos recurso paga e prijs di crisis. Esey tabata e modelo di gobiernonan anterior. Ora cu tabatin crisis ta bin cu impuestonan. Pero nos a scoge pa stimula economia, inverti den poder di compra di nos hendenan y awe nos ta mira cu nos presupuesto ta practicamente balansa, economia ta creciendo y e calidad di bida di nos hendenan ta haya mas atencion tur dia. E MFA'nan ta cuadra den e pensamento y e vision aki y sigur e facilidad aki ta bay ta un contribucion hopi grandi pa e pueblo di Savaneta."

MFA'nan ta dispone di suficiente espacio unda cu por organisa anochinan di lectura of presentacion di arte, creando di e forma aki un espacio unda cu pueblo por bin hunto. Di e forma aki ta duna mas bida na e sentido di coherencia y convivencia den barionan di Aruba, manera Gabinete Mike Eman ta desea. Esaki hunto cu e espacionan publico ta e idea tras di embeyecemento di areanan publico y creacion di parke den barionan “Cu esaki Gobierno ta dal tur dia un paso mas den brinda e pueblo un miho calidad di bida mientras cu na mesun momento ta inverti tambe pa stimula economia.”

Expresionnan haci den e articulo aki no necesariamente ta refleha opinion di ArenaPoliti.co