Gabinete Mike Eman a firma acuerdo di construccion pa MFA Savaneta 

ORANJESTAD - Tur cos ta cla pa cuminsa cu construccion di e edificio Multi Funcional (MFA) di Savaneta. E trabounan ta planea pa cuminsa dia 8 di mei y ta premira cu lo tin un duracion di mas o menos 240 dia, loke ta pone e fecha pa entrega na cuminsamento di aña 2017. Diamars mainta a firma e acuerdo entre Gobierno di Aruba y Sichting Onroerend Goed Aruba (SOGA), cu lo financia construccion di e edificio na Savaneta.

Cuminsando cu Gabinete Mike Eman I a mira e necesidad pa edificionan Multifuncional den barionan di Aruba, cu por mehora e situacion cu na e momentonan aki mayoria di e hulpbestuurskantoornan ta aden. Una bes cu e MFA ta den funcion, e hulpbestuurkantoornan ta bay haya un miho facilidad pa por duna un miho servicio. Banda di esaki ta bay amplia e servicionan cu tin na e momentonan aki y tambe Fannan ta bay tin localnan disponibel pa oficinanan importante pa ciudadanonan di e districto y su bisindario.

Despues cu e proyecto a cuminsa na 2013, e prome edificio Multifuncional, di Noord, a bay den servicio mita di 2015 y a demostra di tin un rol importante pa comunidad di Noord y Aruba en general. Na e momentonan aki ta trahando duro riba construccion di MFA di Paradera y ta den un fase avansa y diamars a tuma luga e firmamento pa inicio construccion edificio di MFA Savaneta.

E trabou di diseño tabata den man di un arkitecto hoben di Savaneta, Ivar Serge Thijsen, kende a expresa di ta hopi entusiasma di mira su diseño, cu ta basa riba e tema di lama, bira realidad. “Unda cu mi bay Sabaneteronan ta puntrami ki dia ta cuminsa construi e edificio aki,” Thijsen a expresa despues di e ceremonia di firmamento. “Mi ta contento di informa nan cu e acuerdo a wordo firma y e trabounan ta cuminsa dia 8 di mei awor.”

Edificionan Multifuncional (MFA) ta un vision di Prome Minister Mike Eman, kende a haya asistencia di un team di hobennan profesional manera e.o. Anky Vrolijk, Jamil Werleman y Omar Harms, kendenan a guia henter e proceso di preparacion te na su ehecucion. E tipo di edificionan aki den e barionan di Aruba “ta importante pa desaroyo di servicio na nos comunidad y un desaroyo importante pa rebiba algo cu ta forma un parti escencial di e caracteristica di nos comunidad,” Minister Eman a expresa despues di a firma e acuerdo. E acuerdo a keda firma pa Minister Mike Eman, Minister encarga cu Infrastructura Benny Sevinger y John Hodgson di SOGA, cu ta encarga cu financiamento di e proyecto.

Gobierno a pone un area di 3400 m2 di tereno disponibel, situa patras di Valero Savaneta, pa construccion di e edificio aki, cu mester ofrece, mescos cu e otro MFA-nan, un ambiente placentero tanto pa e empleadonan como pa cliente. E prome oficina den e edificionan MFA lo ta Oficinanan Auxiliar di Gobierno (Hulpbestuurkantoor).

E proyecto di construccion di MFA Savaneta a wordo otorga na Custom Contractors NV, despues di a gana e destaho publico pa por construi e facilidad multi funcional na Savaneta.

Gabinete Mike Eman II ta spera cu denter di algun luna, e edificio di Paradera ta bay den uzo pa brinda un servicio na tur e barionan den cercania. “Cu esaki nos ta sigui traha pa yega na barionan di cinco strea cu servicionan di 5 strea. Un comunidad unda cu tin un ekidad social husto,” Prome Minister Mike Eman a expresa cu hopi alegria.

Expresionnan haci den e articulo aki no necesariamente ta refleha opinion di ArenaPoliti.co