ORANJESTAD - Construccion di edificionan Multifuncional na Aruba ta algo cu ta revolucionando servicio di instancia y departamentonan di gobierno, manera hulpbestuurskantoornan (MFA). E concepto ta parti di un vision amplio pa Aruba cu Gabinete Mike Eman traha riba dje. Prome Minister Eman, ta hopi envolvi cu e proyectonan na tur fase di nan desaroyo. Na cada fase importante e Minister ta presente pa informa y mira pa su mes di e ultimo desaroyonan y de bes en cuanto tambe duna un man y combersa cu e trahadonan. Diaranson mainta, sr. Eman tabata na sitio di construccion di MFA Savaneta na ocasion cu a yega na ringbalk di e prome piso di e edificio diseña pa un hoben arkitecto cu a lanta na Savaneta, ing. Serge Thijsen. Construccion ta den man di Custom Contractors NV di sr. Jarvis Larmonie.

Edificionan Multifuncional (MFA) tabata un necesidad grandi na Aruba, ya cu mayoria di e facilidadnan di e hulpbestuurskantoornan (HBK) no ta adecua pa duna e servicio necesario y di un manera mas placentero pa e cliente. Banda di HBK, MFAnan tin servicionan adicional importante pa habitantenan e districtonan. “Nos a mira cu e trafico pa e HBK-nan a sigui aumenta y esey a haci cu e facilidad ta bira mucho chikito, y no ta cumpli cu e propositonan mas amplio cu Gobierno tin pa mehora calidad di bida den nos barionan. E servicio tabat'ey pero e calidad tabata wordo afecta pa e espacio limita cu e empleado y clientenan tabatin. P'esey a scoge pa concepto di un edificio multifunctional, unda ta muda HBK y percura pa servicionan adicional manera di SIAD, AZV, Biblioteca, acceso na computer, etc., ta disponibel. Tur esaki a base di nos vision pa mehora calidad di bida,” e mandatario a expresa na luga di e construccion na Savaneta.

Cu realisacion di cada un di e edificionan MFA, habitantenan di cada districto y Aruba en general por mira un cambio positivo den calidad y variedad servicio como parti di e vision amplio di Gabinete Mike Eman na beneficio di tanto hoben, adulto como nos grandinan.

Serge Thijsen di Thijsen Engineering NV a keda encarga cu diseño di MFA Savaneta, kende ta mira dia pa dia con su diseño MFA Savaneta ta haya bida. “Mi no por keha con e trabou ta bayendo,” Thijsen a bisa durante e bishita di Prome Minister na e sitio. E arkitecto tabata hopi entusiasma cu el a haya e chens pa participa den un proyecto asina innovador pa Aruba cu alabes ta mehora calidad di bida pa habitantenan den e diferente barionan.

E bashamento di e ringbalk ta señala comienso di construccion di e segundo piso di e edificio di  MFA Savaneta situa panort di e stacion di gasolin na Savaneta.

Expresionnan haci den e articulo aki no necesariamente ta refleha opinion di ArenaPoliti.co