Cada dia mas hende ta realisando cu nos gobierno t’ey solamente pa sirbi su interes y esun di su amigonan. Tur cos cu gobierno a trata 7 aña largo pa bende pueblo como algo innovativo of necesario pa ‘salba’ e economia, cu e mes a kibra cu su proyectonan miyonario di locura, a wordo copia. Awor copia un cos no mester ta algo malo of negativo. Pero den e caso di nos gobierno, e no ta copia e cosnan bon pero solamente esunnan malo. Awendia nos gobierno ta introduciendo e triki di politiconan Mericano, con pa hinca ‘pork’ politico den legislacion. Den e sistema di hinca ‘pork’ politico den legislacion, politiconan ta hinca tur sorto di proyectonan personal den un ley scondi, cu ta beneficia solamente nan y nan patrocinadonan.

Den e ‘CITGO-deal’ tin ‘pork’ politico hinca. Gobierno a percura pa hinca 5 miyon dollar scondi pa un proyecto piloto di su amigonan, bou capa ‘Green’. Pues algo similar cu gobierno a haci tempo cu e la regala señor difunto Wubbo Ockels, 1 miyon florin pa trece su boto Aruba. Pero e biaha aki, gobierno a sconde e sosten di 5 miyon dollar den e ‘CITGO-deal’ ley. Pues, laga parlamento legalisa algo cu no ta necesario of na interes di pueblo. Si e proyecto piloto di e amigonan di gobierno tabata asina bon, dicon nan no por a busca e 5 miyon dollar cerca e gobierno Hulandes? Dicon mester a sconde esaki den e ‘CITGO-deal’ di 2000 pagina? Ki beneficio Aruba lo haya a cambio pa su 5 miyon dollar di financiamento na e proyecto piloto aki?

Pero mas interesante tabata pa mira con creativo gobierno tabata atrobe pa haya un forma pa pone mas debe riba pueblo su lomba, cu e meta pa faborece su amigonan. Pasobra momento cu e ‘CITGO-deal’ di 2000 pagina wordo aproba pa e parlamento, e inversionista por uza e documento aki manera garantia pa busca su 5 miyon dollar. E mesun triki cu a wordo uza ora a legalisa e proyecto ‘Black Corridor’ di 750 miyon florin. E inkt ni a seca riba e documento, pa e minister di Infrastructura tabata den avion pa firma e contract miyonario cu ‘Deutsche Bank’, pa asina e ‘finder’s fee’ por a wordo paga ‘per direct’.

Den e  ‘Definitive Participation Agreement (Execution version) By and between the Public Legal Entity Land Aruba, CITGO Aruba Holding, LLC, CITGO Aruba Refining N.V. (CAR) and CITGO Aruba Terminal N.V. (CAT), tin skirbi den section 4.4:

‘The parties will respectively cause RDA and CAR to conduct a research and development project to further reduce carbon emissions produced by the Refinery by jointly developing a micro-algae pilot project that captures carbon emissions, as further provided in the Refinery Lease Agreement (“The Carbon Capture Project”). CAR will fund up to $5 million of the Carbon Capture Project’.

Pues 7 aña largo gobierno nunca por a haya placa pa combati insiguridad, traha cas social of inverti den algo real cu ta beneficia pueblo. Pero diripiente gobierno por a uza su creatividad pa sconde 5 miyon dollar (9 miyon florin) den e ‘CITGO-deal’. Pues ‘pork’ politico awor tambe a haci su entrada na Aruba. Ta p’esey e ‘CITGO-deal’, mester a consisti di 2000 pagina unda por sconde hopi ‘pork’ politico miho? Ta p’esey e ‘CITGO-deal’, mester tabata na Ingles, pa asina confundi nos parlamentarionan mas cu ya caba tin un dominio limita di otro idiomanan? Ta p’esey gobierno kier pasa e ‘CITGO-deal’ di 2000 pagina cu un speed relampago di 20 ora den parlamento?

By the way, te ainda pueblo no sa cuanto e aventura ‘CITGO-deal’ lo bay costa, kico ‘Valero’ a haya pa su refineria cu e kier a bende pa 400 miyon dollar, kico a conduci pa e minister di Energia cambia su declaracion di aña pasa cu Aruba no por ta doño di un refineria pa uno cu awor si por? Interesante pa sa dicon parlamentarionan Hulandes ta mas preocupa pa e ‘CITGO-deal’ y su riesgonan financiero cu nos parlamentarionan? Tambe e lo ta bon pa gobierno mustra mas transparencia y splica con pagando 10 miyon dollar (18 miyon florin) anual na impuesto, por ta e ‘salbacion’ di Aruba?

Si nos limita nos mes na solamente e cuestion cu ‘Valero’ tabata kier 400 miyon dollar pa su refineria, anto esaki lo kiermen cu e lo costa Aruba minimal 40 aña pa djis recobra e suma aki. Pues a pesar cu gobierno kier gaña pueblo cu PDVSA kier opera e ‘mehorador’ pa 25 aña, ainda pueblo lo ta pagando pa e refineria ora PDVSA termina su operacion. Ainda falta e otro gastonan scondi, cu pueblo no sa di nan. Pues ni maske cuanto lipstick  gobierno kier pone riba e ‘CITGO-deal’ biyonario pa pint’e manera algo bunita, e ta keda un proyecto cu hopi ‘pork’ politico. Palabra awor ta nos parlamentarionan pa mira si nan lo legalisa e 5 miyon dollar cu tin scondi den e ‘CITGO-deal’ como ‘pork’ politico.


(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co