ORANJESTAD – “Nos ta hopi contento pa mira e alegria den cara di ciudadanonan di De Vuyst,” asina Minister President a cuminsa na bisa diahuebs anochi despues cu hunto cu habitante di e bario sra. Bonnie Duinkerk a cende e prome luz LED. E dianan siguiente, ELMAR ta sigui e trabou di instala e resto di luznan LED destina pa e bario di De Vuyst.

Luz de Bario a yega na e bario pariba di brug y pa instalacion di e prome luz LED, nos prome mandatario tabata compaña pa Minister di Energia, ing. Mike de Meza. “Esaki ta un proyecto cu ta forma parti di un pensamento cu nos a inicia for di momento cu nos a drenta gobierno caminda nos kier percura pa e prosperidad di nos pais por yega den tur skina di Aruba,” asina Premier Eman a splica.

Segun su pensamento, pa hopi aña e pueblo Arubano a biba den un pais cu ta hopi orguyoso pa su hotelnan di cinco strea, pero cu no por a duna nos conciudadanonan un calidad di bida di cinco strea. “Nos soño ta pa un dia nos por bisa cu nos barionan tambe ta di cinco strea; nos casnan di anciano ta di cinco strea, nos scolnan y luganan publico.”

Pesey Gabinete Mike Eman a desaroya un vision pa mehora nos barionan, pa percura pa e servicionan mas elemental ta presente. Den e caso di De Vuyst ya caba tabatin un renobacion amplio di infrastructura, pero ainda tabata falta e luz publico. “Iluminacion ta parti di e vision aki. Tin hopi bario cu ciudadano tin ta biba 30 pa 40 aña, pero nunca iluminacion a yega. Na momento cu nos a dicidi cu ta bay cambia tur luz di cay apa LED a wak oportunidad pa tuma e reduccion di uso di consumo di energia pa duna espacio pa amplia e puntonan di luz rond di Aruba.”

Asina tur siman Ministerio di Asuntonan General ta den otro bario pa pone e luznan aki, cubriendo un necesidad grandi cu tin. Adicional na luz, Minister President tambe ta duna oido na peticion pa asfalt y verkeersplateau. E mandatario ta compronde cu awendia trafico ta mas condensa den barionan y cu hobennan cu ta core duro y no ta pensa cu ta lanta stof of riba e peliger cu ta nifica pa e peatonnan. Ya caba ta trahando hunto cu Minister di Infrastructura y DOW riba esaki y ta instalando verkeersplateau dilanti di tur scol rond Aruba, pero tambe den e barionan.

Un bes cu e prome luz a keda instala na De Vuyst diahuebs anochi, Ministernan Eman y de Meza a comparti cu e habitantenan y personalmente a gradici nan pa e pasenshi di a warda tur e tempo cu a warda. A compromete cu “ta bay sigui reparti e alegria cu awe nos ta mira den bario di De Vuyst y cu ta bay traha tambe pa e ultimo aki tambe por conoce ehecucion di Fase 2 di su mehoracion di bario.

Expresionnan haci den e articulo aki no necesariamente ta refleha opinion di ArenaPoliti.co