A drenta na vigor e aña aki…

ORANJESTAD - Durante tratamento di presupuesto 2016 den Parlamento diamars ultimo, un topico cu a trece varios pregunta pa Minister di Finanzas, Angel Bermudez, tabata tocante deduccion di ‘studielening’ for di ‘inkomstenbelasting’.

E mandatario a anuncia durante e reunion publico cu desde 23 di Augustus, Conseho di Minister a yega na un acuerdo cu su proposicion pa haci e ‘studielening’; specificamente lo cual un persona ta paga na interes y amortisacion deducibel for di ‘inkomstenbelasting’.

Segun Minister Bermudez, e facilidad aki cu a dentra na vigor e aña aki mes, ta duna tur persona e oportunidad yena esaki den nan ‘aangifte’ pa 2016 y deduci for di nan entrada lo cual nan ta paga na impuesto e aña aki.

E mandatario a splica cu e facilidad aki ta mescos cu esun cu ta wordo aplica na Corsou y ta un forma pa motiva tur studiante pa bolbe nan pais y eherce nan profesion. “E intencion di e facilidad aki cu mi a propone, ta pa atrae e yiunan di tera pa bin bek despues cu nan finalisa nan studio den exterior y traha na Aruba mes”, asina Minister Bermudez a expresa.

Ademas, e facilidad aki ta conta tambe pa esunnan cu a studia na Aruba tambe, pero cu a opta pa tuma un studielening di Aruba. Segun informacion adicional di e mandatario, te cu aña 2015, ta solamente e interes paga por a bini na remarca pa deduccion.

Mientras tanto Minister Bermudez a anuncia cu e ta trahando riba e cambio di ley di ‘inkomstenbelasting’ pa asina por acomoda e facilidad aki, sin embargo ya caba a saca un MB cu ta ofrece e areglo aki pa aña 2016.

Expresionnan haci den e articulo aki no necesariamente ta refleha opinion di ArenaPoliti.co