Siman pasa Parlamento di Aruba a trata e cambionan den e Leynan di loon y inkomstenbelasting. Algun di e cambionan aki ta perhudica Pueblo y pesey e Fraccion di MEP no a vota na fabor di e cambionan aki. Awor en adelante no ta coregi belasting mas ora di inflacion.

Asina nos ta haya cu Gabinete Eman cu e cambio di ley aki ta kita den e alivio cu Pueblo mester haya ora cu tin inflacion na nos Pais. E ley tabata stipula cu cada ves cu tin un inflacion, e Minister di Finanzas mester adapta e cobransa di loon y inkomstenbelasting conforme un factor cu ta baha e suma di belasting cu mester wordo paga. Di e manera aki e ley ta percura pa yuda e poder di compra di e trahador. Pero den cambio di ley e mayoria den Parlamento a vota pa kita e obligacion aki y a bay de acuerdo pa Minister di Finanzas bira esun cu lo evalua si e ta bay coregi e cobransa si of no.

Mester remarca cu pa duna e alivio di inflacion, e mandatario lo tene na cuenta si e situacion financiero di Gobierno ta permitie pa por keda sin haya e placa aki di Pueblo. Mirando e hecho cu CFT mes a indica cu te 2040 nos finanzas publico lo yega na normalidad, anto di awor aki caba Pueblo por saca su conclucion cu nunca mas nan lo por conta cu e rebaho di belasting aki. Gobierno lo tin mester di cada florin cu Pueblo por paga y pesey nunca mas lo coregi belasting na inflacion pa yuda e poder di compra di e Pueblo aki.

Pesey ta hopi lamentabel cu awor na vispera di tanto medida cu ta na caminda pa Pueblo, e mayoria di Parlamento di Aruba ta sera nan wowo y ta vota pro pa perhudica e Pueblo trahador.

8 november 2014

Expresionnan haci den e articulo aki no necesariamente ta refleha opinion di ArenaPoliti.co