Awe partido MEP ta recorda e di 30 aña di fayecimento di su lider fundador. 

Awe nos di MEP ta recorda cu 30 aña pasa nos lider fundador y libertador di Aruba, Betico Croes a bay laga nos. No tin palabra pa describi e tristeza cu henter comunidad a pasa aden ora cu dia 26 di November 1986 e noticia lamentabel a yega for di Hulanda cu Betico Croes a fayece y esaki despues cu el a pasa casi 11 luna den coma. No tin suficiente espacio den e medio aki pa repasa henter e trayectoria impresionante di Betico Croes, ya cu e lucha cu el a hiba no a keda na Aruba so, pero a cruza fronteranan di nos pais. Un lucha tenaz cu a ser hiba a base di sanger, sodor y lagrima. 

Betico a uni e pueblo Arubano 
Tabata na aña 1971 cu Betico Croes a haya e inspiracion pa lanta su propio partido politico, esta Movimiento Electoral di Pueblo (MEP) cu e meta principal pa trece cambionan den e structura estatal y tambe pa trece un reparticion husto den e desaroyo economico. Betico tabata sa cu pa logra cualkier meta den bida mester elimina primeramente e segregacion existente den nos pais y trece union den e pueblo Arubano, caminda no tin distincion mas di raza, districto, religion, status financiero of color politico.Den e proceso pa uni e pueblo Arubano Betico tabata e motor tras di henter e lucha pa duna Aruba  su propio himno, bandera, ortografia, simbolonan di union, libertad y identidad di e pueblo Arubano. Semper Betico a bisa cu e ta hopi orguyoso di ta yiu di e pueblo aki.

Momentonan historico
E momento di mas crucial den e lucha pa realisa e deseo di un Status Aparte pa Aruba tabata durante e accionnan di Augustus scur na 1977. Nos Libertador Betico Croes a lidera e accionnan  y ta danki na su insistencia, curashi y determinacion Hulanda porfin a scucha kico realmente ta biba bao di e pueblo Arubano. Otro momentonan historico tabata e Referendum di 25 di maart 1977 y e Conferencia di Mesa Rondo na maart di 1983. Y finalmente entrante promer di januari 1986 nos a conoce nos Status Aparte. Aruba a bira un pais autonomo den Reino Hulandes cu su propio Constitucion, Gobierno, Parlamento, Banco Central, Gobernador, Procurador General etc. Esakinan ta e logronan historico cu a haci cu Betico a haya e titulo indiscutibel di Arkitecto, Constructor y Realisador di nos Status Aparte. Lamentablemente Betico Croes no por a mira ni un seconde di su logro cu tanto el a lucha p’e ya cu algun ora prome cu cambio di aña y na entrada di Status Aparte el a accidenta, a bay den coma y esaki a dura te na su fayecimento dia 26 di November 1986.


Conservacion di nos libertad
Awe riba e fecha di su di 30 aña di su fayecimento, partido MEP ta recorda e ilustre Arubano Betico Croes y den su memoria lo sigui traha incansablemente pa e futuro, felicidad, prosperidad y mas cu tur e conservacion di libertad di e pueblo Arubano y cual libertad lamentablemente a ser mina door di entrega di nos autonomia financiero na man di esnan cu nunca a lucha pa nos Status Aparte.

Riba e dia di awe partido MEP ta invita bo pa conmemora hunto cu nos e fecha di 30 aña di fayecimento di nos Libertador, diasabra, 26 di November 2016 caminda pa 6’or di atardi lo tin ponemento di krans na Santana na Santa Cruz y 7’or di anochi tin un Santo Sacrificio di Misa na Misa na Santa Cruz.
Betico, danki pa tur locual bo a haci den apenas 15 aña di lucha y sacrificio pa logra nos Status Aparte tan anhela y duna nos nos honor y dignidad bek.

Expresionnan haci den e articulo aki no necesariamente ta refleha opinion di ArenaPoliti.co