Durante tratamento di Presupuesto 2017 nos a dedica tempo na ilustra kiko te awor aki ta e saldo di e mal maneho di Minister Eman y su bende. Aruba na man di Gabinete Eman ya no ta mescos mas. Minister Eman a destrui nos Pais riba diferente frontera. Nos autonomia, nos florin, nos naturalesa, nos identidad y nos trankilidad, tur a wordo destrui na man di Eman y den un serie di 4 articulo nos lo amplia riba e destruccion haci. Den e articulo aki nos ta amplia riba e destruccion di nos identidad.

A destrui nos identidad
Minister Eman den 7 aña no a move un dede pa ‘nationbuilding’ na nos Pais. Alcontrario, Minister Eman a dividi nos Pais poniendo hende contra otro y nacion contra nacion. Ela hiba un campaña sushi contra MEP bou di estranhero na nos Pais. Ela laga coordinador di Minister Sevinger bay radio pa bagatalisa y chercha di nos leynan di estranheria. Ela laga hopi hende drenta nos Pais y keda illegal pa abusa di nos sistema. Minister Eman no a brinda respet na nos idioma y no a defende of percura pa integr’e serca esnan cu ta bin biba nobo na nos Pais. Banda di esaki, Minister Eman a laga nos cultura bay perdi, sin dedica atencion na por ehempel nos Fiesta di San Juan y Dia di Betico den enseñansa manera mester ta. Pero Eman a percura pa bin cu un buki cu un historia falso di nos Status Aparte. A bay asina lew di purba kibra e memoria di nos Libertador Betico Croes, kende a siña nos cu nos tin balor como hende, como Pais y cu hunto, uni, nos por logra hopi. Minister Eman a traha duro pa purba destrui e legado aki. A stop di usa Plaza Betico Croes pa actonan protocolario. A sera Caya Betico Croes, lage sangra economicamente y yame pa Caya Grandi of Mainstreet. Y awor ta bay usa Centro Deportivo Libertador Betico Croes como shelter pa supuesto refugiado. Tur esaki djies pa liga Betico Croes su nomber na cosnan negativo, cu e meta pa dividi y esclavisa nos Pueblo na man di debe y pobresa.

Pueblo mester rechasa e destruccion aki
Esaki ta nos Pais su realidad na man di Eman. Nos no por sigi asina. Pueblo mester rechasa e destruccion cu Minister Eman y su bende a haci na nos Pais. No cay pa promesa falso, e realidad di su destruccion na nos Pais ta bisto y e ta den nos man pa para e destruccion aki di nos dushi Aruba.

23 november 2016

Expresionnan haci den e articulo aki no necesariamente ta refleha opinion di ArenaPoliti.co