Algun aña pasa, un politico Curasoleño a yama nos prome minister publicamente pa un ‘makelaar’, pero nunca nos mandatario a nenga of refuta esaki. Wel cada dia, pueblo ta mira pakico e difunto politico a yam’e asina y dicon semper e la keda keto. Un ‘makelaar’ ta bende tur cos pa un comision of pa algo cu ta mehora su posicion personal. Algun aña pasa, Valero a cera su operacion pasobra e no tabata kier paga su ‘fair share’ di impuesto. Valero a hiba Aruba corte internacional y e la perde su caso. Pero asina mes, despues cu e gobierno actual a regala Valero tur sorto di beneficionan, e la bolbe cera su operacion. Un hende sabi, lo a siña su les di e experencianan amargo y anti-pueblo aki. Pero nos gobierno ‘makelaar’, no. Nos gobierno a laga Valero sigui opera su terminal, ganando miyones keto bay, pa despues tambe regala Valero mas beneficionan y exoneracionan cu e famoso ‘CITGO-deal’.

E gobierno actual cu a redobla e debe nacional, cu a impone medidanan severo pa añanan largo riba lomba di pueblo y cu a entrega nos autonomia financiero, tabata sa cu despues di 5 aña di medida y amargura, un parti di e pueblo lo tabata habri pa acepta tur cos. E tactica uza aki pa gobierno, ta e mesun tactica cu ta wordo uza pa condiciona y siña animalnan cierto comportacion desea. E animal intencionalmente ta wordo priva di cuminda of tin biaha maltrata, te ora cu e desplega e comportacion desea. Mas largo e tactica wordo ripiti, mas e comportacion desea ta wordo imprenta den e mente di e animal te ora cu e la bira algo normal.

Awor cu gobierno a logra condiciona e mente di un parti di e pueblo pa no mira e desastre cu e la causa durante 7 añanan largo, e la presenta e ‘CITGO-deal’ como e ‘salbacion’ pa nos economia. E ‘CITGO-deal’ ta nada mas cu un capa pa sigui entrega Aruba, su hendenan y su patrimonionan na otro nacionalidadnan. E proceso di entreguismo, ta andando silenciosamente caba pa añanan largo. Desde hopi tempo, e politico tradicional a descubri cu e stranhero ta su ‘salbacion’, pa compensa e perdida di sosten politico bou di e votado Arubano. Diferente tactica a wordo uza pa e politico tradicional pa asina e pueblo Arubano no ripara cu e isla aki tabata wordo entrega. E excuus mas uza pa e politico tradicional, tabata esun di ‘e rescate di nos economia’.  E politico tradicional a logra bende pueblo cu sin e importacion di ‘trahado’ stranhero, Aruba no por a progresa. Semper e mesun cantica bieu di ‘rescate di economia’ pa hustifica y sconde e plan real: entrega Aruba na otro nacionalidadnan pa asina keda na poder!

E politica di entreguismo y faboritismo, por a yuda e politiconan tradicional keda hopi aña na poder, pero su consecuencianan tabata desastroso. Awendia nos demografia a cambia drastico, tin discordia, menosprecio y insiguridad. Nos custumbernan, tradicion, cultura y folklore ta wordo reemplasa silenciosamente. Normanan, balornan, leynan y hasta hende no ta wordo respeta mas. Pa no lubida cu awendia hasta e la bira normal cu e Arubiano mester comunica na un otro idioma pa e haya servicio.

E efectonan di e politica destructivo aki riba nos sociedad ta permanente. Pa via di un politica barata y egoista, awendia Aruba ta bancarota, tin un pobresa halto, ‘cheap labor’ y trabou temporal a bira normal, criminalidad y insiguridad ta aumentando cada dia, no tin tereno of cas social mas pa esunnan cu ta akinan caba y e Arubiano a bira mientrastanto un ciudadano di tercer clase den su propio pais.

Pero asina mes, e circo politico di gaña pueblo ta sigui, e malgastamento di placa, ‘Amiendanan’ ta wordo introduci sin consulta pueblo, ‘Shelternan’ ta wordo lanta manera paddenstoel na Santa Cruz y Dakota pa ‘refugiadonan’, un ferry ta cuminsa opera e luna aki sin cu e autoridadnan competente tabata sa di algo di dje y desde siman pasa, e MEGA DEBE a wordo redobla cu e ley ‘CITGO/Valero’ den algun ora, pasobra nos parlamentarionan tradicional tabata kier un cabay di campaña.

Cu e gobierno ‘makelaar’ kier sigui firma tur cos scondi cu cualkier gobierno pa asina e mantene e titulo di ‘de braafste jongetje van de klas’, esey no kiermen cu pueblo tin cu acepta esaki. E pueblo aki no a vota pa wordo bendi of entrega na ningun otro nacionalidad. E politico tradicional ‘makelaar’ a demostra na diferente ocasion caba, cu e ta capaz pa sacrifica su propio pueblo, destrui y bende su propio isla pa placa. Y ainda tin hende cu no kier mira esaki.


(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co