FRACCION DI MEP A REUNI CU DIRECTIVA DI FUNDACION HENDE MUHER DEN DIFICULTAD   
PARLAMENTO TAMBE POR YUDA!   

ORANJESTAD -- Lider di MEP Evelyn Wever-Croes y Parlamentario di MEP Guillfred Besaril a reuni cu directiva di Fundacion Hende Muher den Dificultad Suzy Kock y Magaly Maduro den cuadro di e fecha anual cu ta observa violencia contra hende muher y mucha muher.
“Violencia domestico, especialmente violencia contra hende muher, ta algo cu ta afecta e nucleo familiar na e peor forma. Mi kier wak cu nos comunidad ta uni pa kibra e taboe aki, y pa pone un paro na e violencia aki contra hende muher y mucha muher. Pesey nos a reuni cu Fundacion Hende Muher den Dificultad, pa nos wordo informa di e ultimo desaroyonan riba e tereno aki. Ami ta reuni tur anja cu Fundacion pa keda na altura di tur nan trabounan. Mi ta contento cu nos por a haya e reunion aki, y awor nos como Parlamentario ta mihor informa kiko nos mester hasi di nos banda pa combati violencia domestico”, segun lider di MEP Evelyn Wever-Croes.


VIOLENCIA MESTER WORDO ATENDI COMO UN PROBLEMA DI E FAMIA
“Sinembargo nos ta gaña nos mes si nos considera violencia contra hende muher como un problema di hende muher so. Pasobra den e gran mayoria di cada caso di violencia contra hende muher, tin un hende homber involucra. Pesey ami ta boga pa nos atende e problema di violencia contra hende muher como un problema di famia. Mientras nos pais a desaroya riba e tereno material y den infrastructura, nos a neglisha e aspectonan imaterial. Como pais nos a neglisha e nucleo familiar.
Mi ta urgi tur mandatario y esnan cu por hasi un diferencia, pa enfoca riba e NUCLEO FAMILIAR. Si nos duna mas atencion na e famianan cu mester di sosten, y nos concentra mas riba fortifica nos nucleo familiar, nos por cuminsa atende e problemanan di violencia contra hende muher y contra violencia domestico mas efectivamente.
Mi ta urgi pa tur mandatario y esnan cu por hasi un diferencia basa tur accion riba RESPET. Pasobra ta solamente dor di e duna e ehempel di trata otro cu RESPET nos ta duna e señal fuerte na nos comunidad cu tur hende mester trata otro cu RESPET. Por cierto den esaki Parlamento di Aruba a faya, pasobra e sala di e organo mas halto aki a bira testigo di violencia contra hende muher, na momento cu vice presidente di parlamento Chris Dammers lo a dal presidente di parlamento Marisol Lopez-Tromp un mokete den su cachete. Aki Parlamento tin cu drecha su imagen. Sigur con a purba hinca e vilencia aki den ‘doofpot’, no ta beneficia Parlamento.
Y por ultimo mi ta urgi tur mandatario y esnan cu por hasi un diferencia pa nos tuma accion HUNTO, pasobra ta solamente HUNTO nos por brinda cabes na e problema serio di violencia contra hende muher”, lider di MEP Evelyn Wever-Croes a finalisa bisando. 

Expresionnan haci den e articulo aki no necesariamente ta refleha opinion di ArenaPoliti.co