Partido ABO: Y kico nos a logra cu tanto violencia y decadencia social?
Weekend pasa, Aruba a bolbe wordo confronta cu e hecho cu nos isla ta cayendo den un decadencia social total. Banda di e incidentenan regular di polis, tambe tabata tin dos caso di tiroteo. Uno den centro di playa dilanti un misa y uno den e sector turistico. Den e ultimo, morto y herido grave a cay. Dos sitionan hopi publico y dos sitionan unda hopi hende ta bishita. Imagina bo mes cu durante e tiroteonan a la ‘Wild West’, un of mas hende inocente lo por a bira victima tambe. Kisas nos no a para pensa riba esaki. E biaha aki e no ta trata di ‘un Latino’, pero di un hoben Arubano. Pues, ‘Home Grown’.
Regularmente nos di partido ABO ta señala con cada dia nos sociedad ta cayendo pa uno unda no tin respet mas pa otro y unda corupcion, agresion y violencia a bira normal. E incidentenan di weekend pasa, no ta incidentenan isola. Aña pasa den e mesun temporada, un hoben a wordo tira den su cas na Sint Maartenstraat na San Nicolas. Gang di bario X ta bay bringa cu bario Y cu arma blanco y arma pisa. Ladronnan ta atraca cas y tur sorto di negoshi na cualkier ora di dia cu arma. Pa nos no lubida cu awendia bo no por ni bay disfruta di un carnaval sin cu no tin bringamento, hincamento of tiroteo.
Cu polis ta haci nan maximo esfuerso, ta algo bon. Pero polis no por haci tur cos y polis tambe conoce su limitenan. Awor kico pueblo kier pa pasa prome e exigi pa e decadencia social total aki para. Pa nos sali di cas, nos mester bisti un ‘bullet-proof vest’? Nos tur tin cu cana rond cu arma of ‘body guard’? Pueblo mester wordo ‘gefouilleerd’ of pasa door di un ‘metal detector’ cada 100 meter? Mester pone camara di siguridad colga na cada palo di luz? Mester pone tralie of camara di siguridad na tur cas y edificio? Ta esaki pueblo tin cu haci pa e sinti su mes un tiki sigur? Awor claro, bo lo tin hende cu lo bay bisa cu algun (of tur) di e medidanan aki ta necesario pasobra Aruba tambe no a keda isola di e ‘trend’ mundial di e decadencia total. Den esaki, nos contesta di partido ABO ta: Kico, ta strea di nort nos a perde? E por wel ta cu esaki por ta e ‘trend’ mundial, pero esey no kiermen cu nos mester tum’e over of acept’e. Y ta akinan ta unda e rabo di e porco ta krul. E complaciencia di nos hende pa acepta y tolera tur cos pasobra un hende den poder of cu autoridad a bis’e, a haci cu awendia tur cos a bira normal. Aruba ta un isla chikito unda nos por soluciona hopi di nos problemanan si nos kier, no tin miedo of nos lanta for di soño y confronta e realidad amargo.
Si algo ta fout, e ta keda fout. Ni cuanto un hende trata di papi’e bon, e ta keda fout. Nos tin e tendencia aki na Aruba pa warda te ora e baca a hoga y cu tiburon come e baca full, pa core bin cu solucionnan temporal of mil y un comision pa mustra pueblo cu e autoridad tin atencion pa e problema. Resultado di esaki ta, cu semper e solucionnan ta decoracion cosmetico, cu ta costa hopi placa cu tin e solo meta pa tira santo den wowo di pueblo y duna e politico un PR-show bunita. Na final pueblo ta lubida y e ta warda te un otro incidente similar sosode pa grita y lamenta. Ningun di e solucionnan temporal aki, a cambia e desaroyo social negativo cu Aruba ta experenciando pa hopi aña caba, den uno positivo. Cada dia e criminalidad y insiguridad ta aumenta y parce cu cada dia nan ta bira mas violento.
Posicion di partido ABO:
- Awendia e maneho di husticia y siguridad ta dividi entre tres minister: E minister di husticia (Polis y OM), e minister di Inmigracion (DIMAS) y e minister-president (Openbare Orde en Veiligheid). E ultimo aki casi nunca ta na Aruba, dus e no sa kico ta pasando den e sociedad y ora e ta riba e isla, e ta mas ocupa cu su shownan personal enbes cu e bienestar general. Husticia y siguridad mester ta den man di un minister;
- Mester controla mas y miho na frontera, pa asina haci e posibilidad cu armanan pisa por drenta Aruba;
- E castigonan penal pa posesion of uzo di arma, mester subi drastico. Un multa no ta suficiente mas. Mester agrega tambe castigo di prizon;
- Mester subi tur e castigonan pa violencia, agresion y criminalidad drastico y traha mas riba prevencion y conscientisacion;
- Manera tur e gobiernonan a laga e populacion crece desproporcional y sin un planificacion, Aruba tambe a importa problema social di otro paisnan cu antes nos no tabata conoce. Mester bin mas polis y trahadonan social pa atende cu e problematica specifico aki cu nunca a haya e atencion debido;
- Mester percura cu nos corte y sistema hudicial traha mas lihe y eficiente. Warda 100 aña prome cu un delito wordo procesa, ta inaceptabel;
- E persona cu no a nace aki na Aruba y cu comete un delito penal pisa, mester wordo deporta for di e isla permanente despues cu el’a sinta su castigo. Mester investiga tambe e posibilidad pa kita e nacionalidad Hulandes di dje, si e persona a wordo naturalisa;
- Mester aloca mas fondo y recurso na departamento social, scolnan y na obranan social pa yuda guia y educa e hobennan pa asina nan no cay asina facil den criminalidad;
- Mester crea mas cupo di trabou pa hobennan, enbes di laga nan keda sin trabou, riba caya y perspectiva;
- Mester duna e eliminacion di corupcion, e combatimento di narcotrafico y e problemanan social, mas atencion.
(www.aboaruba.org, This email address is being protected from spambots. You need JavaScript enabled to view it.)
Expresionnan haci den e articulo aki no necesariamente ta refleha opinion di ArenaPoliti.co
Articulo similar
7 motibo pa laga Pueblo eligi su Gabinete
Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...
Sigui lesa...