Eddy Ras di POR ta duna di conoce cu den rapport anual di Ministerio Publico di 2014 tin informacion detaya, y por mira cifranan cu ta distingui entre “menornan di edad y mayornan di edad”, cu di un manera of otro a cay den man di husticia. Tambe e rapport ta specifica cuanto hende homber y hende muher a wordo confronta cu husticia.

E resultado ta lo sigiuente.

A base di e cifranan por mira cu en total tabatin un total di 2480 caso (2032 + 440 + 8). Nos por mira cu 138 caso tin di haber cu menornan di edad. Cual ta un porcentahe di 5,56 % ((138 / 2480) x 100%). Locual tambe ta remarcabel ta cu 81,94 % ((2032 / 2480) x 100%) di e casonan ta hende homber y 17,74 % ((440 / 2480) x 100%) ta hende muher. Menor di edad ta bou 18 aña di edad y mayor di edad ta 18 aña bay ariba.

Cu tin 138 caso di menor di edad cu ta confronta nan mes cu husticia, ta señala cu mester un maneho pa evita un grupo di menornan di edad cay den actonan castigabel pa ley. Pa traha riba un maneho cu ta evita e menornan di edad cay den man di husticia, mester di mas informacion specifico. Cu esaki, como Gobierno pa medio di cartera di Asuntonan Social, tin un bista riba cua grupo di menornan di edad tin cu bay pone mas atencion riba dje. Mester sa: ken nan ta, den ki situacion nan ta, ken nan mayornan ta, etc.

Acerca tabatin 2334 caso unda mayornan di edad a haya nan confronta cu husticia. E personanan aki tambe mester tin un bista di nan pa sa si nan a yega di cay den man di husticia tempo cu nan tabata menor di edad.

A base di e informacionnan specifico di e personanan cu ta cay den man di husticia, tin informacion di cua ta e motibonan cu menornan di edad ta comete e actonan contra ley. E informacionnan ta duna indicacion pa por traha un programa preventivo y curativo. Preventivo pa evita cu menornan di edad cay den actonan criminal y curativo pa evita cu menornan di edad cu a cay den man di husticia no bolbe ripiti. Si no traha riba e situacionnan cu ta hiba menornan di edad haci actonan cu nan por hayanan confronta cu husticia, ta permiti un ambiente pa mas menornan di edad bay haci actonan indesea.

Door cu falta informacionnan specifico ta limita decisionnan pa yega na por formula un maneho pa e menornan di edad pa evita cu nan por bay haya nan confronta cu husticia. Pa por tin informacion concreto ta bay manda un carta cu preguntanan, por ehempel via intermedacion di Parlamento, pa por haya mas informacion for di e Ministerio di Asuntonan Social y Ministerio di Husticia.

Expresionnan haci den e articulo aki no necesariamente ta refleha opinion di ArenaPoliti.co