E siman cu a pasa nos por a bolbe tende un parlamentario di oposicion ta cuestiona gobierno y CITGO encuanto e proceso di tuma trahador den servicio. El a declara cu E ta tene tanto gobierno como CITGO/PDVSA responsabel pa mantene nan mes na e acuerdo di 80 versus 20. E parlamentario ta actua como sifuera cu E y su fraccion lo no a vota pa e acuerdo cu gobierno di AVP a negocia !!

PPA ta tene gobierno di AVP den su totalidad y e 20 miembro di parlamento cu ta e.o. di fraccion di AVP, MEP y Dem Real responsabel pa e acuerdo aki cu no ta tene cuenta debidamente cu interesnan di tanto e contratista y trahador arubiano. Y aki gobierno y e 20 miembro di parlamento mester splica pueblo di Aruba cu nan no a hasi nan ‘huiswerk’ y a vota PRO un contract hopi cuestionabel.

E miembro di parlamento ta referi na nos contratistanan y ta referi na e trabao pa prepara e asina jama ‘mankamp’ cu den pasado a worde prepara y maneja pa un compania local. Sinembargo tanto gobierno y parlamento ta debidamente na altura cu locual nan a negocia y locual nan a vota pe …ta duna CITGO/PDVSA tur libertad pa scoge companianan y trahadornan di exterior sin tene cuenta cu interes di pais Aruba.

Manera PPA hibando oposicion di pafor di parlamento a jega di splica nos pueblo cu e acuerdo cu a worde negocia y aproba pa e 20 miembro di parlamento ta stipula lo sigiente.

Mientras ta trata dicidi kende esta e ‘contratista’ cu ta bai ejerce un trabao y su trajador esaki ta completamente den man di CITGO/PDVSA esta nan no ta mara na ningun deber di tuma contratista local y trahador local.

Ta solamente ora tuma trajador den servicio cu lo funciona directamente bao di e compania di Citgo/PDVSA …e ora ey ta stipula cu nan ta mara na un acuerdo di 80 % di trahador local y 20 % di trahador di exterior. Pero e reparticion aki no ta conta ora ta trata contratista y su trahadornan aki gobierno di Aruba y 20 miembro di parlamento a larga e asunto aki totalmente liber na e ‘absolute discretion’ di CITGO/PDVSA. Y e libertad aki ta conta durante full e periodo di e contract esta 15 pa 20 anja.

Awor PPA ta comprende bon bon pakiko a duna CITGO/PDVSA e libertad aki pasobra ta solamente bao di un structura asina e wega grandi por worde juna cu contratista cu CITGO/PDVSA y tambe algun figura cu tin interes scondi den esaki.

Pa oposicion hasi manera awor nan ta defende interes di contratista y nan trajadornan ora cu durante e proceso den parlamento nan lo mester a hasi esaki. PPA ta considera cu tanto gobierno como e 20 miembro di parlamento deliberadamente a larga interes di contratista local y trahador afor.

PPA ta spera cu nos contratista local y trajador local ta consciente di e situacion unda CITGO/PDVSA por hasi y deshaci sin tene cuenta cu interes local den esaki. Entodo caso PPA ta tene tanto gobierno como fraccion di AVP, MEP y x Dem Real responsabel pa esaki !!


Aruba, 11 december 2016
Lider Politico di PPA
BENNY NISBET

Expresionnan haci den e articulo aki no necesariamente ta refleha opinion di ArenaPoliti.co