ORANJESTAD – Ministernan Eman, de Meza, Croes hunto cu representantenan di e team negociado di e acuerdo cu a keda firma cu Citgo Petroleum Corporation, a haya masha bon comentario riba e acuerdo cu a keda conveni. “Gobierno na tur momento a bin ta negocia na un forma serio," Minister encarga cu asuntonan laboral, drs. Paul Croes a segura. "E acuerdo tabata bon prepara. E acuerdo tabata bon hinca den otro pa e tecniconan di Aruba, e terminonan legal cu nos a yega riba dje, e terminonan fiscal cu nos a logra, e acuerdo laboral cu a wordo cera cu e refineria y locual nos ta purba splica na tur e organisacionnan tambe ta e importancia di apertura di e refineria aki pa nos Pais." Esaki el a expresa na final di varios sesion di informacion cu gremionan local relaciona cu apertura  di e refineria, cu hunto cu coleganan Minister Eman y de Meza y e team negociado.

Despues di e presentacion, basta pregunta a wordo haci na Minister di Labor Paul Croes y su coleganan Prome Minister Mike Eman y Minister di Asuntonan Economico Mike de Meza, relaciona cu e proceso laboral, aspecto financiero y con e refineria ta bay aporta na economia y finanzas di Gobierno di Aruba. Tambe tabatin pregunta riba e contract di huur, e business model nobo y e reparticion di tereno. "No mester lubida", Minister Paul Croes a splica, "cu ta prome biaha cu Aruba ta negocia un acuerdo pa e refineria unda cu pais Aruba ta doño di esaki y ta huur esaki na un operador, den e caso aki Citgo Petroleum Corporation."

A bini pregunta riba e aspecto huridico. Por ehempel, riba e hecho cu e acuerdo a wordo cera cu Citgo Petroleum Corporation y no cu PDVSA. Un di e preocupacionnan cu hopi hende tin, e Minister Croes a splica, ta cu tin un situacion vulnerabel na Venezuela. Pero el a sigura cu no mester tin preocupacion, pasobra Citgo ta un compania Americano, cu su shareholder ta PDVSA, pero tin di opera segun ley y reglanan Mericano.

A splica esnan presente cu den e ultimo 30 añanan di Gobernacion na Venezuela, den tempo bon y malo, e industria di petroleo a sigui y na ningun momento el a wordo afecta y tampoco a afecta e compania aki na Merca. Pesey ta importante pa e ciudadanonan ta na altura cu e principal partner comercial di Venezuela ta keda Merca. El a sigura cu, como partner comercial, e dos paisnan aki semper a sigui nan relacion comercial normalmente.

Reapertura di e refineria ta bay hunga un rol hopi importante pa economia di Aruba, cuminsando cu e cuponan di trabou cu e ta bay crea cu ta calcula cu ta bay reduci e cifra di desempleo cu 3 pa 4%. E impacto economico total ta, calcula na, 15% di economia di Aruba. E inversion total pa rehabilita e refineria ta uno cuantioso y ta mas o menos 750 miyon dollar cu ta bay beneficia negoshinan di Aruba, particularmente na San Nicolas.

Un parti importante di e acuerdo ta cu Pais Aruba ta bira doño for di augustus proximo en padilanti di e refineria na San Nicolas. Pais Aruba ta lease esaki na Citgo Petroleum Corporation, pa por opera e refineria, pa un suma di mas o menos 20 miyon dollar anualmente y e operador mester paga un impuesto riba ganashi di 10 miyon dollar, cu nan haci ganashi of no. Si en caso nan haci ganashi, e contribucion na caha di Pais Aruba ta bira mas. Si tur cos cana segun e plan, entrante augustus ta cuminsa cu e proceso, di 18 pa 24 luna, pa rehabilita e refineria pa e por procesa e crudo extra pisa di Venezuela y produci mas di 200,000 bari pa dia di crudo sintetico.

Expresionnan haci den e articulo aki no necesariamente ta refleha opinion di ArenaPoliti.co