ORANJESTAD – Durante e ceremonio di develo di e Monitor den Tempo Real di Energia Renobabel e siman aki, Minister President Mike Eman a reflexiona riba e trabou den ekipo cu ta tumando luga y con e trabou ta responsabel pa e exito alcansa te aworaki. E ta felicita tur e expertonan local cu ta forma parti di dje y ta encurasha nan pa sigui cu e dedicacion pa yega na e meta pone di un Aruba sostenibel aki 4 aña.

“E Vision 2020 ta un trabou hopi grandi cu ta pone un responsabilidad hopi pisa riba nos tur, pero sigur riba esnan cu ta encarga cu produccion y distribucion di energia, den e caso aki WEB, Utilities y ELMAR,” e mandatario a enfatisa. “E tres companianan aki tin e tarea pa traduci e vision y filosofia den un practica factibel y pagabel, cual ta un reto riba su mes. Pesey nos ta hopi orguyoso di nan cu ta trahando duro pa haci esaki posibel.”

Premier Eman a gradici Luis Oduber, Francis Ras, Josef Everon y Carlos Ras hunto cu nan ekipo fuerte cu ta traha sumamente duro. “E no ta facil, pero tur dia nos ta tumando mas stap den e direccion aki,” Minister President Eman a expresa. E siguiente paso cu WEB, Elmar, Utilities y Gobierno di Aruba ta tumando pa amplia e capacidad di produccion solar di Aruba ta instalacion di panelnan riba dak di scol y otro edificionan publico.

Prome Minister Eman: “Nos ta hopi contento cu Scol Primario Kudawecha tin un capacidad basta grandi, di 175 KiloWatt cu ta cla caba. E siguiente scol ta Abraham de Veerschool. Mester a warda vakantie paso ta un scol cu ta basta usa, te hasta den oranan di atardi.” E lista aki ta continua cu 14 otro edificio rond di Aruba, pa un total di 16 edificio publico.

Tur hunto, e produccion total di 2.6 MegaWatt y ta parti di un proyecto cu WEB Aruba, hunto cu su partnernan, a desaroya pa un integracion decentralisa di instalacionnan Solar (PV). E proyecto ta duna contenido na vision di Gabinete Mike Eman pa Aruba ta 100% los for di combustibelnan fossil na aña 2020.

E proyecto di instalacionnan solar riba edificionan publico, primariamente scolnan rond di Aruba, ta bou maneho di WEB Aruba NV. Partnernan di WEB den e proyecto aki ta Ministerio di Asunto General, Ciencia, Innovacion y Desaroyo Duradero, Ministerio di Enseñansa y Famia, Departamento di Enseñansa, WEB Aruba N.V., Elmar N.V., Departamento di Obranan Publico (DOW), Dienst Technische Inspecties (DTI), Utilities Aruba N.V., TNO (Toegepast Natuurwetenschappelijk Onderzoek), Carbon War Room y Rocky Mountain Institute.

Expresionnan haci den e articulo aki no necesariamente ta refleha opinion di ArenaPoliti.co