Vision di Gabinete Mike Eman II ta continua. 
Siman di 19 di januari a cuminsa di gran forma pa Gabinete Mike Eman II na momento cu a cuminsa cu e trabounan pa construccion di e di dos edificio di MFA na Paradera. Prome Minister Mike Eman presente a expresa su satisfaccion, ya cu e sitio na unda e Oficina Auxiliar Paradera ta situa awor no ta adecua mas pa e servicionan cu e ta brinda.

Aña pasa a cuminsa cu construccion di e prome di e cinco edificionan MFA cu ta den preparacion na Noord cu ta riba schedule pa wordo entrega maart proximo. E MFA-nan aki, e mandatario a expresa e mainta aki, ta hopi necesario pasobra un cantidad grandi cu ciudadanonan di bario ta busca diferente tipo di servicio mas cerca di nan. "E vision cu nos a presenta algun aña pasa y cu nos a cuminsa traha riba dje ta birando realidad." A wordo splica cu Gobierno a inverti den edificionan aki pa nan refleha e necesidadnan den cada un di e barionan. Pa logra esaki tabatin anochinan di consulta cu habitantenan di e barionan p'asina e arkitectonan tende di e necesidadnan cu tin. Pero tambe a haci un estudio cual ta e necesidadnann pa servicio na e oficinanan auxiliar di Gobierno. Ya caba 5 tipo di documento por wordo busca na Censo na Oficina Auxiliar di Gobierno, hibando e servicio mas cerca di ciudadanonan den bario.

E ariba menciona, Prome Minister Eman a señala, ta haci cu e fluho di personanan cu ta acudi na e Oficinanan Auxiliar di Gobierno ta aumenta "poniendo un presion basta grandi riba e facilidad unda ta ricibi of duna servicio na ciudadanonan. Pesey a cuminsa pensa con pa modernisa y amplia e facilidad den cual e HBKnan ta ubica y haci nan multifuncional di biaha." Den e MFA-nan a crea un ambiente hopi mas agradabel pa e cliente por spera su turno pa wordo atendi of pa e ciudadano haci uzo di un di e facilidad cu tin, incluso pa hobennan.

Den e vision aki, Gabinete Mike Eman II a scoge cinco (5) arkitecto cu tin afinidad pa e barionan, pa inclui elementonan cu e bario ta haya importante pa keda refleha den e arkitectura. E ubicacion scogi pa e MFA Paradera ta net dilant e Hulpbestuurskantoor actual, unda cu tin hopi baranca y e arkitecto Joel Croes a percura pa esaki wordo inclui den e landscaping di e proyecto.

"Henter Paradera ta bay haya un edificio hopi mas eficiente y agradabel, un area pa grandinan por topa otro y bebe un koffie," Eman a splica.

E edificio MFA lo tin un area pa BSK, pero tambe tin espacio pa grandinan topa, oficina pa fundacion, espacio publico pa diferente tipo di presentacion y hopi mas. "Pesey nos ta contento cu awe nos a yega asina leu, diseño, haci destaho publico y awor e trabou ta bay cuminsa," e mandatario a duna di conoce.

E proyecto aki ta un cambio hopi grandi pa pueblo di Paradera y bisindario hunto cu iniciativanan priva manera riba veld di Britannia, cu ta contribui na un mehoracion di calidad di bida.

Expresionnan haci den e articulo aki no necesariamente ta refleha opinion di ArenaPoliti.co