Nos tin un Prome Mandatario burachi di poder. Siman pasa nos gobernador nobo SE Alfonso Boekhoudt a duna su inauguracion na nos Parlamento. Sr. Eman a presenta cu su Vak Minister Richard (0 voto) Arends y e otro 6 Ministernan cu ta cobra un schat di placa di pagado di belasting a keda sin presenta. Den e recepcion inaugural pa nos gobernador esaki tawata peor. NIUN Minister no a presenta, solamente dos Parlamentario di AVP. Den e rueda di prensa di e Forsa (Bobo) Nobo ex-Minister Otmar (10.000 m2) Oduber no a condena e actitud infantil y bergonsoso tampoco, pues indicando cu su persona tambe ta contra San Nicolas, Aruba y Rey di Hulanda. 

Falta di respet
Esaki ta un falta di respet total pa nos Cas Real. Tanto Sr. Eman a papia di bon relacion cu Reino, tur luna un portada cu ta costa balente placa pa pretende algo cu Sr. Eman no ta. Acaso Sr. Eman a lubida cu Rey Willem Alexander a corona Sr. Boekhoudt y hasta gobierno Hulandes a dun’e su debido respet, algo cu Gabinete Mike Eman a nenga di haci. Acaso nos Prome Minister a lubida nos constitucion mustrando claramente un peliger pa nos estado di derecho? Esaki ta e eror di Mike Eman su bida despues di a haña un KB na 2014 pa mal maneho di pais Aruba entre 2009-2013. Y esaki despues cu su Gobierno a hiba un welga di hamber fracasa y consecuentemente un supervision financiero como Curatela, entregando un parti esencial di nos Autonomia. Nunca mas Mike Eman por drecha e falta total y dictatorial contra nos Cas Real. 

Rabia riba Cas Real 
Sr. Eman ta e unico responsabel pa henter e blunder politico aki pasobra e no a haya su kier. Den pura su ruman homber ex-Prome Minister Henny Eman a bay casa pa por bira Gobernador, pero Mike Eman su plan tawata un fracaso total incluyendo e otro candidatonan pa gobernador. Loke Sr. Eman y AVP a haci ta causa daño grandi na nos pais. Un falta di respet pa coronacion di nos Rey su representante no ta bay wordo lubida nunca mas. Nos di Movimiento Electoral di Pueblo a scrap fecha di Independencia na 1990 bao liderasgo di nos Líder e tempo ey Sr. Nelson Orlando Oduber. Contrario di locual AVP a haci ta mustra odio contra nos Rey. Nos tur por corda e welga di hamber pa un siman, batimento di wea y tiramento di awa riba ex-Gobernador su auto y tambe menasa na su cas.
Sr. Eman tin rabia riba Cas Real pasobra e no por a sigui manipula y aproba su presupuestonan ficticio cu ayudo di su compinchinan perhudicando e destino di henter nos pueblo. Gasta tur placa di nos pais y basicamente triplifica nos debe nacional contra tur regla di bon gobernacion. Te na 2040 cu un crecemento economico di 3% kisas por yega bek unda Movimiento Electoral di Pueblo a laga nos pais na 2009.

Mas daño na nos pais
No tin palabra pa describi e mal actitud infantil contra nos Cas Real y contra nos Gobernador. No tin un medio di comunicacion cu no sa cuanto placa Gabinete Mike Eman a fiesta cu ne iresponsabelmente cu awe miles di famia na Aruba no tin empleo, coriente tampoco awa. Con Sr. Rene (Baba) Herdé y e otronan den AVP cu a grita pa WODC den pasado, anto awe nan ta di acuerdo cu e falta di respet pa nos Cas Real? Ta cuanto mas daño Mike Eman y su partido AVP kier haci na nos pais? Sra. Marisol Lopez-Tromp, Lainda Westerhoff, Richard Visser, Otmar Oduber y varios otro politiconan ta bandona AVP, hasta e Minister fracasa di Finanza Juancho (Geen Bezwaar) Yrausquin a bolbe pasobra e placa ta dushi. No tin niun hende den AVP pa papia sano huicio cu Mike Eman pasobra nan ta doño di e partido. Esaki si tawata un falta di respet total pa nos Cas Real door di AVP y AVP-2.

Expresionnan haci den e articulo aki no necesariamente ta refleha opinion di ArenaPoliti.co