Error….error……error     

E error di su bida Mike Eman a comete door di no mustra respet na nos Gobernador nobo y na Rey Willem Alexander. Un blunder indespensabel! Nunca mas e por drecha e falta total di respet pa nos cas Real. E excusa estupido cu ta pa motibo cu no ta un evento official ni obligatorio a pone e gabinete Mike Eman di keda sin presenta na un evento asina importante pa nos pueblo y nos pais ta un locura.

Ridiculo pasobra na otro actividadnan cu no ta oficial ni obligatorio, semper e tey. Pa hasi show y spektakel semper Mike Eman tey. Locual Mike Eman y AVP a hasi a causa daño grandi na nos isla. Pasobra un falta asina grandi di respet pa nos Gobernador nobo y nos Rey no ta bay worde lubida nunca y maske di banda di MEP tur respet a worde duna, ta keda cu un parti di nos pueblo a mustra odio contra nos Gobernador y nos Rey, e parti di pueblo cu AVP ta representa!
Odio pasobra otro splicacion no tin pa un actitud asina bochornoso. Tur e gobernantenan di Hulanda sa cuanto odio Mike Eman tin contra nos cas Real. No tin palabra pa discribi e mal hecho haci contra nos Cas Real y contra Hulanda. Pesey nos no por kere cu berdad ta Mike Eman no kier a duna respet na nos Cas Real, pero ta e doñonan di partido AVP a dicidi esaki.

Tur hende sa con Mike Eman a neglisha nos propio pueblo pa e por complase cu Hulanda, pa entrega nos autonomia y pesey ta un obligacion pa mustra Hulanda cu e falta di respet cu Mike Eman y AVP a mustra Cas Real ta worde desaproba door di nos comunidad den su totalidad y cu ta un grupo chikito den AVP ta esnan cu tin e odio contra Hulanda.

E pregunta cardinal ta keda kico ta pasando cu e otronan den AVP cu sigur no por ta di acuerdo cu e falta total di respet pa nos Cas Real. Nan tambe ta comprende cu e excusa di cu e actividad no tabata oficial no tin credibilidad y cu e falta total di respet cu e actitud aki a mustra ta afecta nos tur seriamente. Ta cuanto mas daño mester worde causa prome cu e otro integrantenan di AVP bisa cu ta basta y kita e poder di e doñonan actual y cambia e rumbo di e partido. Nan no por ta asina ciego cu nan no ta mira ki desgracia AVP ta bay aden.

E error di su bida cu Mike Eman a comete door di no mustra respet na nos Gobernador nobo y na Rey Willem Alexander, nunca mas e por drecha! Un eror ireparable di e falta total di respet pa nos cas Real. Mike Eman simplemente no por sigi goberna nos pais.

Expresionnan haci den e articulo aki no necesariamente ta refleha opinion di ArenaPoliti.co