Den combersacion cu Prome Minister Eman y delegacion. 

DEN HAAG/ORANJESTAD - Prome Minister Mike Eman a biaha pa Hulanda hunto cu Minister Sevinger y secretario di Conseho di Minister sra. Hoevertsz pa delibera cu Minister di Asuntonan di Reino Plasterk riba e nombracion di gobernador cu no a bay segun proceduranan acorda y ratifica na 2002 y tension serio cu a surgi. Hulanda unilateralmente a  nombra e Minister Plenipotenciario sr. Boekhoudt como e siguiente gobernador di Aruba. Algo cu no a cay den bon tera cerca Gabinete Mike Eman. Motibo pakico Premier Eman a bay Hulanda pa papia cu Plasterk riba e tema controversial aki.

Despues di e reunion largo y intensivo Plasterk a admiti cu enberdad e procedura no a bay manera mester tabata e caso, Prome Minister Eman a duna un declaracion relaciona cu e asunto aki. "E reunion tabata necesario mirando e desaroyo peligroso pa Reino Hulandes y e ambiente di cual e tabata aden. For di 7 di october cu gobierno di Reino a bay over na nombracion di un gobernador nobo pa pais Aruba - cu no tabata e candidato di gobierno di Aruba - sin a cana e procedura corecto pa yega na tal nombracion - a surgi un situacion cu no tabata nada bon. Di un banda tabatin un proceso cu no a cana corecto, pero asina mes encamina pa gobierno Hulandes y na otro banda un candidatura hiba pa un persona cu no tabata e candidato di gobierno di Aruba. Gobierno di Aruba a notifica e persona en cuestion aki  cu ta elegante pa e por a participa na gobierno Hulandes cu e no ta eligibel ya cu e no ta e candidato di gobierno di Aruba." Eman a splica cu e dos puntonan aki a conduci na un crisis grandi di confiansa di gobierno di Aruba den direccion di gobierno di Reino pasobra tin procesonan pa cana ora di nombracion di un gobernador. Esakinan ta proceduranan  cu a wordo ratifica den Conseho di Reino na 2002 unda ta poni cu e pais na unda ta nombra e gobernador, e candidato mester tin aprobracion di e gobierno di e pais ey. "Si Hulanda tabatin un problema cu un di nos candidatonan, den caso di Bermudez a surgi e tema di edad, pero Bermudez mes a kita esaki di caminda door di aclarea cu e por bay e full seis añanan, e ora e proceso cu a wordo ratifica y documenta den Conseho di Reino na 2002, ta bisa cu e candidato cu ta wordo proponi su nomber ta bay Conseho di Reino. Si tin un problema cu e persona, anto e Minister di Reino ta puntra e pais en cuestion pa bin cu nomber di un otro candidato. Pero, nunca por ta asina cu Conseho di Reino ta parachuteer un otro persona sin mas." Eman ta haya cu aki Hulanda a perde tur respet y a viola den forma grave e acuerdo cu a wordo ratifica den Conseho di Reino na 2002.

Durante e periodo tras di lomba gobierno di Aruba tabata den deliberacion cu Hulanda y tabata duna su punto di bista, Eman a bisa. "Lamentablemente toch Hulanda a sigui su curso y dia 7 di oktober a haci e nombracion y esey a causa tanto den pueblo di Aruba, como tambe den henter Reino Hulandes - di parti di Corsou y Sint Maarten a constata cu e reglanan a wordo viola y durante e siguiente reunion di Conseho di Reino nan a protesta fuertemente contra e proceso aki  - un disgusto grandi. "

Hecho ta si cu awor violando reglanan ancra den Conseho di Reino, Aruba tin un gobernador nombra cu un KB cu ya caba a wordo firma pa Rey Willem-Alexander. Esaki a crea un situacion masha complica y delicado pa Reino Hulandes y e relacionnan, pero tambe pa Institutonan importante manera esun di Rey y di Gobernador. "Esaki tabata motibo pa den Conseho di Minister pensa bon kico ta e siguiente paso pa tuma y e decision a cay pa bin Hulanda y delibera cu Minister Plasterk y mustre bon cla cu locual a sosode no ta corecto y na mes momento busca solucion con pa sigui padilanti. Tur biaha bo busca un solucion, esey ta bira un convenio. Di un banda Minister Plasterk a admiti cu erornan grave a wordo haci den e proceso di nombracion di e gobernador nobo. Cu e pasonan manera e procedura ta defini no a cana su caminda corecto. Ta pesey cu awor nos tin un nombracion cu no ta cuadra cu e procedura. Di otro banda Aruba tin caba un nombracion cu un KB y aunke Aruba por a dicidi pa hiba e asunto aki Corte y na Raad van State. E caminda ey por a wordo encamina y ta conoci cu mas y mas Cortenan ta duna opinion riba asuntonan similar. Asina ta cu e caminda e di cana tey, pero e ora ta sigui un polemica dentro di Reino riba e tema aki. Ta di importancia fundamental pa tuma e miho decision den e caso aki." Eman a conta cu e combersacion cu Plasterk a tuma su curso, e tabata largo y intensivo prome a yega na un acuerdo cu Reino.  Plasterk durante e combersacion a reconoce cu erornan grave cu a wordo cometi. A sali cu comunicado unda cu e ta bisa cu tanto palabra y di otro banda - Aruba ta conoci pa esaki - en busca di e interes di e desaroyonan positivo den Reino Hulandes, a scoge e caminda pa mira con sali di e situacion aki den forma constructivo.

Expresionnan haci den e articulo aki no necesariamente ta refleha opinion di ArenaPoliti.co