ORANJESTAD -- 'Mi ta contento cu e pleito cu sr Mike Eman a busca cu Hulanda ta pasando, y cu nos por bai atende e problemanan real den nos pais bek, y mi ta satisfecho cu sr Mike Eman a acepta e nombramento di sr Alfonso Boekhoudt. Mi ta lamenta si cu cos mester a bai asina.

Kiko ta resulta awor?
Siman pasa Mike Eman a manda un carta brabo pa Hulanda, den cual e ta EXIGI pa para e nombramento di sr. Boekhoudt; pero awor, ya el'a guli su carta aden hunto cu e nombramento. Causando si un discusion enorme den henter comunidad, y loke ta mas tristo, causando lastramento di nomber di sr. Boekhoudt.
Awor ya e ta canta un "toontje lager", y mester a guli tur cos manda abou.

GOBIERNO DI AVP TAMBE A COMETE EROR DEN E PROCEDURA
Locual si a resalta den e comunicado di gobiernonan di Hulanda y Aruba hunto ta cu ambos ta admiti di a comete erornan. Hulanda y Aruba ta admiti cu nan no a cana e caminda corecto manera mester ta. Kiermen, sr. Mike Eman tambe a actua fout. Mi ta puntra mi mes, si ni esaki Mike Eman por a hasi bon, ta kiko si e por hasi bon? Nos sa cu el'a tarda pa entrega su lista di candidato, y e no a defende candidatura di sr Angel Bermudez. Mike Eman mester duna cuenta na pueblo ta kiko mas el'a hasi fout pa Hulanda a trat'e na e forma ey. Pasobra ta cu AVP so e cosnan aki ta pasa, ta AVP so Hulanda ta trata di e forma aki. Y e por a scapa tur e gastonan di biahe relampago aki, cu sigur ta entre 15 y 20 mil florin, y nos por a yuda hopi hende cu e placa ey.

CONFIANSA DEN SR. ALFONSO BOEKHOUDT
Locual ainda ta keda preocupante ta e relacion entre Eman y sr Boekhoudt. Pasobra Mike Eman a kita sr. Boekhoudt for di trabou, a humili'e y a retira confiansa den dje. Awor Mike Eman y minister Plasterk a hasi bon bek, pero ki ubo di sr. Boekhoudt mes? Mike Eman a insult'e, Mike Eman a manda su voceronan lastra sr. Boekhoudt y su yiunan! Esey no por keda asina y Mike Eman mester bin splica ainda con e ta bai atende esey, of si e ta bai guli esey tambe. En todo caso Mike Eman debe sr. Alfonso Boekhoudt un disculpa pa esaki!

Nos ta satisfecho cu e pleito a caba liher, sin un welga di hamber, y nos ta spera cu awor nos por bai goberna e pais aki. Ban combati criminalidad, ban caba cu abuso sexual di nos muchanan, ban mehora nos cuido di salud cu ta cabando cu nos hendenan. Ban uni como pueblo tras di nos Gobernador interino nobo entrante 1 di november 2016 y nos Gobernador nobo entrante 1 di januari 2016.

Expresionnan haci den e articulo aki no necesariamente ta refleha opinion di ArenaPoliti.co