Dialuna Ministernan Eman y Sevinger a bin Parlamento pa duna cuenta den un reunion di vragenuur riba e drama rond di e nombracion di e Gobernador nobo pa nos Pais. Como cu ta trata di un reunion di vragenuur, e dos Parlamentarionan cu a haci pregunta por escrito y cu a pidi pa Minister Eman bin contesta den Parlamento, a haya turno promer pa haci nan pregunta y despues e otro Parlamentarionan a haya un minuut di tempo pa haci preguna. Nos a logra haci 7 pregunta, pero manera a para bira custumber hopi pregunta a keda sin haya un contesta concreto di Minister Eman.

Preguntanan haci na Minister Eman
1. Dicon sr. Boekhoudt no ta bon pa Minister Eman y AVP pa e funcion di Gobernador? 2. Nos por haya copia di tur corespondencia entre Gobierno y Hulanda riba e nombracion di Gobernador? Nos por haya e conseho tambe di abogado Sjiem Fat manera cu Minister Eman a indica? 3. Minister Eman por splica den ki forma Hulanda a sugeri candidato? 4. Den ki forma Minister Eman a protesta contra e decicion di Hulanda? 5. Minister Eman ta aproba tur lastramento di sr. Boekhoudt y su famia? 6. Minister Eman ta bay duna un despensa publico? Si ta si, ki dia ta hacie. Si ta no, dicon? 7. Pakiko Minister Sevinger a bay Hulanda tambe y pakiko e tey awe den e reunion aki den manera un talisman?

Ningun contesta concreto
Minister Eman no a duna ningun contesta concreto. Riba e pregunta dicon sr Boekhoudt no ta bon pa Minster Eman y AVP, e mandatario a indica cu ta principio ta conta y cu ta Gobierno ta nomina. Pero Minister Eman no kier a bisa concretamente ta dicon e no kier mira sr. Boekhoudt den e puesto di Gobernador. E mandatario a keda keto riba e pregunta di lastramento di sr. Boekhoudt y su famia y e despensa publico cu nan lo mester haya. Na lugar di esaki Minister Eman a bisa cu e sacrificio mas grandi y e prijs mas caro ta AVP a page, ya cu asina mes cu tur cos ta mustra cu Hulanda a actua robes, AVP a scohe pa sacrifica y stop tur discucion cu Hulanda riba e tema aki pa por tin paz den Reino. Esta un hilaridad y muestra di cobardia di Minister Eman cu a mustra aki di laga Aruba cay tanten cu Reino keda bon. Pa locual ta trata e pregunta di e presencia di Minister Sevinger na Hulanda y den e vragenuur, Minister Eman tampoco kier a duna un contesta. Esaki ta muestra cu ta di berdad Minister Sevinger a fungi djies como un talisman pa Minister Eman, cu by the way no a trece ningun suerte cune ya cu ni na Hulanda of na Aruba su presencia por a kita e berguensa for di e cara di Minister Eman den e drama aki rond di e nombracion di Gobernador nobo.

Oportunismo politico
Mester remarca cu Minister Eman a tuma masha hopi tempo pa tilda MEP di ta practica oportunismo politico cu e drama rond di nombracion di e Gobernador nobo y cu opocicion mester rise to the ocacion y para banda di AVP aki nan pasobra cu cosnan a bay robes. Aki atrobe Minister Eman kier culpa otro pa su propio fayonan. Pero no ta MEP, sino AVP ta esun cu cada ves ta haci cos di entregista y ta e propio Minister Eman a haci uso di oportunismo politico pa nombra sr. Boekhoudt pa Minister Plenipotenciario pa Gabinete Eman na Den Haag y awor diripiente no kier splica dicon e mesun persona aki no ta apto pa AVP y Minister Eman pa por fungi como Gobernador pa nos Pais. Pesey Minister Eman mester samina su mesun consenshi promer cu e bin tilda MEP di algo cu e mes ta practica den optima forma. Ma tur esaki Minister Eman ta bin cune djies pa desvia atencion pa e por keda sin duna contesta concreto na e preguntanan riba e nombracion di e Gobernador nobo pa nos Pais.

24 oktober 2016

Expresionnan haci den e articulo aki no necesariamente ta refleha opinion di ArenaPoliti.co