Noticia na nos Pais ultimo dia ta alarmante. Ta parce manera cu Aruba a para bira un neishi di ilegalidad na man di Gabinete Eman. Nos ta confronta cu noticia di traficacion ilegal di hende, traficacion ilegal di bestia, traficacion ilegal di droga, atraco arma riba comerciante na su propio cas y avioneta ilegal ta cay riba pista di aterizahe. E noticianan aki ta hopi alarmante y ta muestra cu cos a bay hopi foi sla na nos Pais. E ta bisto cu Aruba a para bira un neishi di ilegalidad na man di Gabinete Eman.

Ilegalidad ta wordo tolera y fomenta
Cu awe nos Pais ta out of control asina ta debi tambe na e manera cu Gabinete Eman ta anda cu ilegalidad na nos Pais. E Ministernan di Gabinete Eman no ta dunando ehempel drechi, nan ta tolera ilegalidad y hasta ta fomenta esaki door cu nan mes ta duna e mal ehempel cu ta ok pa tene man cu hendenan cuestionabel. Pasobra ta ki señal nos Minister President Eman ta manda ora cu e ta deal cu Kiko Gomez kende a wordo sentencia pa traficacion ilegal di arma, droga y hasta asesinato? Ki señal nos Minister Otmar ta manda ora e ta deal cu Ospino kende a wordo deteni pa traficacion ilegal di arma y riba dje a tira un atraco arma den dia cla den zona turistico di nos Pais? Ta ki señal Minister Sevinger ta manda ora cu bou su wowonan y halanan permiso ta wordo duna na hende riba lista di CIA pa por permanece na nos Pais? Ta ki señal Minister Sevinger ta manda ora e ta duna dezerzijds akkoord na Rincon kende ta deteni bou sospecho di a soborna ehecutivonan di PDVSA? Ki señal ta wordo manda pa Minister Sevinger ora cu e ta previligia un solo famia cu mas di 90.000 metro cuadra di tereno? Y mas cu claro, ki señal Minister Dowers ta duna ora cu e ta keda sin haci nada y djies sinta wak con su coleganan ta anda cu hende cuestionabel, cu mas cu 11 mil dollar di fondo publico ta bay na un proyecto fantasma di strawberry y su colega ta permiti pa hende riba lista di CIA haya permiso pa keda nos Pais? Ta esakinan ta e señal robes cu ta wordo manda na nos sociedad, pasobra si e Ministernan mes cu mester percura pa traha conforme ley ta tolera y fomenta criminalidad, ta pakiko e Pueblo mester haci otro?

Rechasa Eman y su bende
Nos Pais mester sali di e caos aki. Pueblo no por keda duna nan sosten y confiansa na un grupo di mandatario cu ta tolera y hasta fomenta criminalidad. Si na e nivel ey bo ta anda asina, bo por ta sigur cu bo Pais ta bira un neishi cu ta atrae tur sorto di ilegalidad y ta pone cu e Pueblo ta biba bou di e stress y e mal calidad di bida cu ilegalidad ta trece cune. Pueblo mester rechasa e maneho di Minister Eman y su bende y kita e mayoria deposita den nan pa asina duna Aruba un chens pa bira un Pais bek na unda cu ordo y respet por prevalece y e Pueblo por hiba un bida trankil sin e stress cu ilegalidad ta trece cune.

25 oktober 2016

Expresionnan haci den e articulo aki no necesariamente ta refleha opinion di ArenaPoliti.co