Promer minister Mike Eman tawata den parlamento dialuna mainta hunto cu minister Sevinger pa contesta preguntanan haci pa lider di fraccion di AVP Baba Herde. Miembronan di parlamento tambe a haya oportunidad pa haci pregunta pero esaki a keda limita na solamente 1 minuut pa cada miembro. Lamentabel tawata e hecho cu apenas 6 miembro di fraccion di AVP a presenta na trabou y a acudi na e vragenuur cu a wordo yama pa propio lider di fraccion di AVP. Esaki ta e hendenan cu ta grita continuamente no work no pay y awe nan mes no a presenta na trabou. Ta importante pa nos informa pueblo con parlamento ta funciona di berdad y kendenan tin interes di nos pais realmente na pecho.

Durante e reunion aki promer minister Mike Eman a admiti cu e la accepta e nombracion di gobernador Alfonso Boekhoudt pa PAZ den REINO. Nos a puntra promer minister na e momento ey cuanto e como promer minister ta dispuesto pa accepta pa paz den reino. Cuanto autonomia mas e ta dipuesto pa entrega? Kiko mas Aruba lo perde?

Nos tur por corda con Mike Eman a subi avion dialuna atradi siman pasa rumbo Hulanda cu un tono cu e NO ta accepta e nombracion di gobernador Boekhoudt. Su gobierno a cuminsa cu un campanja di difamacion contra Sr Boekhoudt y hasta a hinca su yuinan y su famia den e discusion aki. Na dado momento a bai asina leu di yama Sr Boekhoudt pa traidor di patria. Mi no ta kere cu esaki ta manera pa trata nos futuro gobernador y defame y insukte di e manera aki. E ta un Arubiano di San Nicolaas y sigur merece e respet como nos future gobernador.

Un cos ta sigur, esun culpable y responsabel pa e situacion cu a wordo crea aki caminda Hulanda a impone y nombra un gobernador pa Aruba ta Mike Eman. E propio Sr Eman aki a invita tur e Hulandesnan pa bin investiga gobierno anterior sabiendo cu nos ta un pais autonomo y ministerio publico di Aruba mes lo por a haci e trabou aki si tawata necesario. Despues cu WODC a bin Aruba y nada a sali afor a sigui e mal maneho financiero di Mike Eman cu a conduci na un pais bancarota cu mas di 4 biyon florin na debe. Consequentemente gobernador NO a firma e presupuesto di anja 2014 y Mike Eman a haya su promer KB. Despues di esaki CFT a haci su entrada official na Aruba y NOS a perde nos autonomia financiero. Ora nos a kere Mike Eman a stop di entrega na Hulanda a surgi e situacion cu tin actualmente. Promer minister Mike Eman NO a sigui e procedura manera cu mester ta. Ta para hopi cla cu promer cu e final di termino di nos actual gobernador Sr Refunjol yega Aruba lo mester manda un lista di posibel candidatonan. Gobernador Refunjol su termino lo mester a caba 1 mei 2016 y apenas 12 dia promer esta 18 april 2016 promer minister Eman a manda yama lidernan di fraccion di parlamento pa presenta e lista di candidatonan. No tawata tin consensus ni na Aruba la loke ta trata e candidatonan aki y Hulanda tambe for di luna di mei 2016 a informa Mike Eman cu e ningun di e candidatonan cu gobierno di Aruba a manda NO lo wordo considera. Envez cu Mike Eman actua responsabel y manda algun otro candidato a scohe pa bai confrontacion sabiendo e resultado final y sabiendo cu e NO Lo lucha cu alma y cuerpo toch. Ora a bira conoci cu Hulanda a nombra sr Boekhoudt y asina a dicidi pa gobierno di Aruba, Sr Eman a bula bai Hulanda pa regla asunto. Ora nos a kere e lo lucha pa defende nos autonomia den apenas 15 minuut un biaha a sucumbi pa presion y a accepta Sr Boekhoudt. Ta logico awor pa nos pakiko e la trece TNO, Rietveld, Philips, Ports of Amsterdam y tur e otro companianan for di Hulanda. Pa defende interesnan commercial Hulandes Mike Eman a demostra di ta dispuesto pa accepta tur loke wordo dicidi for di Den Haag pa Paz den Reino! 

Expresionnan haci den e articulo aki no necesariamente ta refleha opinion di ArenaPoliti.co