E nombracion di e gobernador nobo di Aruba contra reglanan stipula a causa un discusion y un division grandi den nos pais. Pa esnan cu ta kere cu esaki ta un asunto di perde y gana, ata aki e ganado y perdedornan.

GANADO
Na Aruba niun hende of partido a gana nada den e proceso cu a tuma luga. Ta perde nos a perde. E unico "ganado" den e nombracion illegal di e gobernador nobo ta gobierno di Hulanda. E daño cu gobierno di Hulanda a causa den su relacion cu Aruba, Corsow y St. Maarten, no ta un preocupacion p'e. Meta di gobierno actual di Hulanda ta pa e relacionnan den Reino bira asina malo, cu Aruba, Corsow y St. Maarten mes ta fada y ta dicidi di sali for di Reino. Door di viola flagrantemente palabracionnan y leynan den un forma arrogante, gobierno di Hulanda ta scohe pa ofende Aruba, Corsow y St. Maarten y sigui daña e relacion entre e cuatro paisnan den Reino. E biaha aki gobierno di Hulanda a viola e acuerdo riba procedura pa nombra gobernador pa Aruba, Corsow y St Maarten. Pero gobierno di Hulanda a logra hasta mas cu ela pensa. Pasobra ela haya sosten pa violacion di palabracionnan haci di un solo partido politico den e tres paisnan di Reino den Caribe. MEP a aproba y aplaudi e violacion di e procedura pa nombra gobernador, pensando cu asina nan ta pone cara di gobierno di Aruba na berguensa y saca probecho politico. En realidad loke MEP a haci, ta mustra un falta inmenso di respet pa ley y reglanan. MEP a ofende y denigra e pueblonan di Aruba, Corsow y St Maarten, pone Aruba mustra malo y duna gobierno di Reino e sosten (cu e no a spera). Awor gobierno di Hulanda por bisa "ta bosonan mes a sostene loke nos a haci." Gobierno di Hulanda a sali gana mas ainda cu e sosten di MEP.

PERDEDO
E perdedonan den e nombracion aki ta Aruba, Corsow y St. Maarten. Tur tres pais ta bolbe haya nan confronta cu un madre patria cu no ta respeta palabracionnan haci, cu no ta coopera, pero ta dicta den forma colonial. Y pa colmo cu sosten di MEP! Otro perdedo ta e funcion di gobernador cu a wordo degrada pa un extencion directo di gobierno di Hulanda na Aruba. E perdedo final ta e persona - un Arubiano- cu awor ta bira gobernador di un pueblo dividi riba su persona y riba nos relacion cu Hulanda. E persona cu Hulanda a scohe y nombra, no a wordo eligi. E no a wordo sosteni door di gobierno di Aruba. Ela wordo scohi y nombra contra tur regla door di gobierno di Hulanda y impone door di gobierno di Hulanda. E ta cuminsa ocupa e funcion cu hopi duda den su integridad. Pakico e no a gradici pa un nombracion sabiendo cu esaki ta sosode contra di proceduranan acorda na 2001. Tin duda si e por of lo bay para pa Aruba. Of lo e actua manera gobierno di Hulanda bis'e pa haci? Kico ta kita hende di pensa cu e a wordo scoh'i y nombra door di Hulanda, awor e tin cu obedece nan. E daño haci ta grandi. Ta bay tuma hopi tempo y hopi esfuerso pa restablece e respet pa ley y palabracionnan y respet pa e funcion di gobernador. Awor e funcion ta wordo mira como un funcion den cua gobierno di Hulanda ta nombra un hende cu nan kier, pasobra nan ta pensa cu e lo traha pa nan. E confiansa den Reino a wordo seriamente daña door di gobierno di Hulanda. E daño cu MEP a causa cu su oportunismo no ta cu solamente MEP a demostra di no tin niun principio of respet pa ley y reglanan cu pa colmo nan mes a aproba. E partido MEP a bolbe demostra di ta laga oportunismo ciega nan pa tur e consecuencianan di loke nan ta haci cu nos pais. Enbez di para pa ley y reglanan palabra, MEP a scohe pa probecho politico a corto plazo. Cu e lider di MEP y su miembronan no ta wak esey, ta pone ainda mas duda den nan sinceridad y sentido di responsabilidad pa bienestar di nos pais! 

Expresionnan haci den e articulo aki no necesariamente ta refleha opinion di ArenaPoliti.co