1. Esun cu mas voto riba lista ta worde elehi,
2. Elimina firmamento di Lista y
3. Ta elimina e formula pa atende cu ‘restzetel’ …esun cu tin mas voto di pueblo cu a resta e momento ey ta ricibi e asiento  !!

Cu atencion PPA a tuma nota di e proposicion di cambio di e kiesverordening cu fraccion di MEP p/m di sr. Dangui Oduber ta propone esta cu basa riba un democracia mas optimal lo mester stipula cu asientonan cu worde hanja pa un organisacion politico lo mester bai pa e candidato cu mas voto. Esaki cu e meta pa eleva nos sistema democratico.  PPA ta hanjele hopi stranjo si….cu e principio pa eleva nos sistema democratico ta para eynan y no ta sigui pa cu tur aspecto di nos ‘kiesverordening’ cu no ta mucho democratico !

Na prome lugar PPA kier referi na e hecho cu semper ta miho pa trece cambio den un ‘kiesverordening’ e anja prome cu eleccion …ja tur hende por ta envolvi y cu por duna tempo pa pensa e cambionan aki profundamente. Locual pasa durante un anja di eleccion …semper ta larga hopi pregunta atras. Na di dos lugar  ora di hasi cambio riba un ‘Ley di eleccion/kiesverordening’ tabata un custumber den nos pais cu ta manda puntra e partido politiconan cu no tin representacion den Staten pa duna nan opinion y contribuiccion na e Ley cu un tempo responsabel pa nan analisa y contribui na esaki tambe. PPA ta spera cu lo mantene e tradiccion aki den e caso aki !!

Cambionan pa mejora nos democracia !!

Elimina firmamanto di Lista !!

Segun nos sistema nos lo mester tin  secrecia di voto !!  Pero e  condicion/drempel cu ta exigi di partidonan politico  no representa den parlamento cu lo mester ricibi un 550 firma  pa por participa semper a worde mira como un condicion cuestionabel. El a worde larga asina simpelmente pa motibonan puramento politico y pa kita un par di dia for di e partidonan aki  cu no por bai campanja prome cu nan cumpli cu e deber aki.

PPA ta di opinion cu una vez ta bai trece cambio den e ‘kiesverordening’ lo ta bon pa  trece cambio y kita e deber aki completamente for di nos Ley di eleccion. Hasi cu e proceso cu mester worde kana ta ‘igual’ pa TUR partido politico sea bo ta den parlamento of no  y kita e punto aki cu ta empugna cu e principio sagrado di nos secrecia di voto y pone un stop na esaki !!

Un voto ta igual durante ‘full’ e proceso  !!

Manera ta conoci e ‘kiesverordening’ ta nos pais Aruba ta sali for di punto di salida cu kada persona inscribi den registro di nos Censo y ta Hulandes y 18 anja di edad tin derecho di vota y kada ciudadano su voto ta igual.  Un persona Un voto !! Te na momento cu jega na e capitulo conta reparti locual ta worde jama ‘restzetels’.  E momento ey ta drenta un  formula cu no ta reconoce e principio mas cu un voto ta ‘igual’ algo cu pa anjas a worde critica y cuestiona pero e partidonan cu un majoria  no a scoge pa trece cambio den esaki pasobra e formula antidemocratico aki ta juda nan y perhudica e representacion segun decision di pueblo.

Basa riba e mesun meta di fraccion di MEP pa mejora nos democracia y funciona segun votacion di pueblo e mester ta posibel pa trece cambio den e forma cu ‘rest-zetels’ ta worde duna.

Un democracia bibo y correcto ta trece cunele cu simpelmente e partido cu tin mas voto e momento ey lo mester bin na remarca pa e asiento !!  Y no un formula cu derrepiente ta cambia e principio di un ciudadano un voto ………den un partido cu ja tin asiento …..tin mas derecho riba e ‘rest-zetel’ cu un partido cu no a logra un asiento ……..e  argumentacion nunca tabata segun e principio di democracia y a jega e momento pa trece cambio den esaki tambe !!

Subsidio na Partidonan Politico !

Na mes momento PPA ta propone  si ta bai  trece un Ley pa financiamento di partido politico pa na e mes momento introduci subsidio  di gobierno na democracia arubano. E interes major di nos comunidad. Regla pa tur partido ricibi un subsidio pa nan por carga nan gasto basico…na Television, Radio y den Courant. Esaki lo minimalisa e  inversion necesario di  otro. Nos a keda ‘babuca’ cu tin partido cu ta jama nan mes  social democrata cu ta contra di e pensamento aki !

Conclussion:

PPA ta  invita  partido MEP pa  agrega e cambionan menciona relaciona cu e  meta pa mejora nos funcionamento democratico  esta  

A. Esun cu tin mas voto di pueblo riba un lista ta worde elehi !

B. Elimina e condicion di  firmamento di Lista ! (empugna cu secrecia di voto !)

C. E  momento ta trata rest-zetels ta duna e asiento na e partido cu e momento ey a resta mas voto di pueblo !! Pa nos ta mas cla…..si ora p.e. 19 asiento a worde aloca  y  e partidonan a keda  cu A. 400 voto, B 700 voto, C    1200, voto   D.   390 voto  y E.  1900 voto  e asiento ta bai pa  restzetel no. uno ta bai pa E. cu su 1900 voto y e restzetel no. 2 ta bai pa C. cu 1200 voto ..pasobra esey tabata decision democratico di pueblo y no e formula cu ta worde usa.

D. E si mester bin un Ley riba financiamento di partido politico  entroduci di viaha un subsidio pa kada partido riba nan financiamento ja lo kita tur posibel  acto menos bon cu ta tanto preucupante !

Sperando riba un posicion positivo di fraccion di MEP y demas fraccionan den parlamento esta AVP y x Democracia Real  pa logra tur cambio necesario pa mejora nos funcionamento democratico.

Y mantene e  custumber di duna tur partido  No representa den parlamento un participacion den e cambio di nos ‘kiesverordening’ door di duna e oportunidad y espacio pa por duna nan ‘voz’ por escrito durante e proceso aki ….si nan opta pa hasi esaki !!

Aruba,  18 januari 2017
Lider Politico di PPA
BENNY NISBET

Expresionnan haci den e articulo aki no necesariamente ta refleha opinion di ArenaPoliti.co