Siman pasa e mandatario di Finanzas, Angel Bermudez a ricibi Sr. Andrés Cadena y Sr. Daniel Stephens cu ta representa e compania multinacional di consultoria, McKinsey & Company. E reunion aki tabata un continuacion di Minister Bermudez su ultimo biahe na Washington caminda nan a topa na e reunion anual di Fondo Monetario Internacional (IMF), October ultimo.

Durante e reunion anterior Minister Bermudez a delibera cu McKinsey riba diferente tereno cu nan lo por aporta nan conocemento y experticio amplio den e forma di consehonan of consultoria manera cu nan a yega haci cu practicamente tur pais na mundo. Como resultado di e prome reunion, nan a dicidi bishita Aruba e biaha aki pa asina trece diferente proposicion y continua e deliberacionnan cu Minister Bermudez.

Segun e dignatario, en berdad nan a mustra cu nan tin tremendo experticio y cu sigur nan por duna nos un man riba varios tereno, por ehempel cu e ‘kerntaken analyse’ cu tambe tabata un topico cu a delibera riba dje. “E kerntaken analyse cu nos tin plania pa cuminsa e aña aki ta trata di un analisis cu ta wordo haci di e aparato gubernamental pa wak eingelijk cua ta e servicionan cu Gobierno lo mester duna na su comunidad y cual ta e servicionan cu e por laga e sector priva duna”, Minister Bermudez a splica.

E analisis aki tambe ta tuma na cuenta e servicionan cu no ta actual mas, pues cu por wordo aboli pa asina logra  yega na un aparato di Gobierno cu ta sumamente efectivo y cu mas espacio pa aumenta e calidad di servicio cu un Gobierno ta duna. “Nan ta masha e bakia den e tereno aki y nan a priminti nos cu nan lo duna nos un oferta pa wak si nos ta interesa pa nan haci’e pa nos” e mandatario a sigui splica.

Ta conoci cu Gobierno ta considerando pa introduci e “Financial Transfer Levy”, pues esaki tambe ta un topico cu e mandatario a trece padilanti den e reunionnan cu McKinsey. Segun e mandatario, e director di e compania aki na Colombia, esta Sr. Andrés Cadena tin hopi experticio y experiencia pa loke ta trata e tipo di cobransa aki cu por cierto tambe a wordo implementa  na Colombia tempo cu Sr. Cadena mes tabata eherce un funcion halto di Gobernacion.

“Den e proximo simannan ora cu mi ricibi e proposicion y consehonan riba e diferente topiconan aki nos lo dicidi si McKinsey mes lo por haci esaki pa nos den termino corto. Tambe nos lo por tuma un decision final riba e cobransa di e ‘transfer levy’ cu a menciona den nos presupuesto supletorio 2014 y cu lo ta un di e formanan di entrada pa e Gobierno pa asina yega na un cero deficit pa aña 2017”, e dignatario a indica.

Finalmente Minister Bermudez a menciona cu pa mita di aña aki e decision lo mester ta cla y bisto si en berdad lo introduci e ‘levy’ y mescos ta conta pa e ‘kerntaken analyse’ cu tambe lo mester tuma luga den e curso di e aña aki. Ambos punto ta inclui den presupuesto supletorio 2014 como tambe den e concepto di e presupuesto 2015. Esaki ta forma parti di e reforma di e aparato gubernamental, caminda cu a base di investigacion y estudio adecua e mandatario di finanzas ta trahando pa logra yega na un aparato cu ta sumamente efectivo dentro di e cuadro financiero cu ta disponibel y tambe garantisa pa e 10 aña nan venidero, Gobierno di Aruba por duna su comunidad un calidad di servicio cu espacio pa mehora y aumenta den calidad.

Expresionnan haci den e articulo aki no necesariamente ta refleha opinion di ArenaPoliti.co