Mayoria di projecto na Aruba ta enfoca riba e turista, cual di un banda ta na su lugar si nos tuma na cuenta cu e ta nos mayor pilar economico. Sinembargo pa e yiu di tera y esnan cu a hasi di Aruba nan hogar poco ta e atencion cu tin. Bushiri Hotel riba su mes ta for di 2001 - 2002 abandona. Tanto gobierno di MEP como di AVP a hasi promesonan pa desaroya projectonan hotelero.
Rudy Lampe como Parlamentario a propone pa basha e ruinanan di ex-Bushiri y debolbe esaki na pueblo como beach publico ya cu ta tereno di gobierno. Na 2015 ultimo a hasi un encuesta cu a haya tremendo acogida cual ta di converti e area di Bushiri y ex-container haven den uno di recreacion pa e publico local

Laga nos yame un rato "Parke Familiar"!

Ciudadnan rone mundo manera Bucaramanga na Colombia ta conoci pa nan parkenan familiar den centro di ciudad.
Despues di mudamento di container haven pa Barcadera, ta e momento propicio pa desaroya e area aki den uno di rikesa natural pa nos comunidad cu bista pa lama.
ReD hunto cu encuestadornan ta pensa riba:
1. Area di Bushiri Hotel den beach publico, camping cu bbq area
2. Area container haven cu recreacion pa baby y mucha
3, Area pa famia, cu jardin, vijver di awa di lama eynan mes
4. Community Pool cu "awa di lama" y waterslides (eynan mes lama ta)
5. Dino Jump and playground
6. Pet area pa paseo di animalnan domestico
7. Outdoor Gym
8. Skate Park
9. Beach tennis/soccer/volletball area
10. Picnic Area
11. Running y walking track
12. Area pa nos grandinan
13. Un teatre/cine/stage aire liber (presentacion di obranan local/standing comedy)
14. E mesun park ta converti den Concert Area (I Love Music, EF, Summer Fest, Soul Beach Fest etc)
15. Stand di cuminda y bebida local cu nos awa di Coco, mini restaurants maneha pa NOS hendenan cu nos pisca y pan bati.

ReD naci di movimento #ARUBADUSHITERA tin halto den su programa medio ambiente den harmonia cu nos dushi hendenan. Trahando un facilidadnan asina na un forma inteligente e mantencion no mester ta impagable. Nos pueblo tambe merece di haya parti di e bonanza cu e pais aki ta haya di e.o. turismo.
ReD ta mira dilanti pa en berdad hasi di e isla aki uno FELIS bek caminda UNION FAMILIAR lo prevalece!

#VozDiPuebloDenParlamento #PartidoBlanco #BoVotoTaUnArmaPoderoso use bon, use conciente, use sabi...!!!

Expresionnan haci den e articulo aki no necesariamente ta refleha opinion di ArenaPoliti.co