Prome Minister Mike Eman ta hopi satisfecho   
A prefera esey enbes di desaroya esaki den uno comercial/economico   

ORANJESTAD – Prome Minister Mike Eman y su colega di Infrastructura Benny Sevinger tabata hopi contento durante un conferencia di prensa diaranson na ex Bushiri Hotel. E dia aki, Prome Minister Eman a haya cu mester wordo cataloga como uno special  si mira cu Bushiri a keda 16 aña largo para bandona eynan, porfin lo wordo basha’bou pa cuminsa desaroya e area aki.

Na dado momento, e mandatario a splica cu Parlamento, Gobierno y Pais Aruba tabata para na un punto, den pleno desaroyo di e pais, unda cu mester a dicidi riba dos opcion. Sea ta scoge pa e medio ambiente y espacionan publico desaroya of ta pensa riba futuro desaroyo crecemento economico di Aruba, y pa e ultimo opcion aki tabatin y tin diferente oferta pa desaroya otro actividad eynan. For di prome momento cu a cuminsa papia riba desaroya e area den un espacio publico, a surgi un entusiasmo grandi bou di e pueblo. Principalmente pasobra ta papia no solamente di un beach, pero espacionan unda por practica diferente tipo di deporte, unda cu pueblo por bini hunto y comparti hunto cu amigonan y famia. “Esaki pa nos na final tabata e prioridad y a resisti pa tur e plannan bunita cu tabatin, cu por ta importante pa e aspecto comercial, pero e aspecto cu mas a pisa pa nos tabata esun di sostenibilidad, miho calidad di bida pa nos hendenan y acceso na beachnan. Aki nos ta bay tin un luga sumamente atractivo pa pueblo. Nos ta hopi contento cu nos por a cana e caminda aki y awe e momento a yega cu cuminsa cu un limpiesa grandi pa entreg'e bek den man di pueblo.”

Manera ta conoci, den Parlamento e decision a wordo tuma pa sigui cu e proposicion di Gobierno pa desaroya henter e area aki pa pueblo di Aruba, cu lo beneficia di construccion di facilidadnan unda ta bay tin actividadnan deportivo, cultural y di arte. Interesante den desaroyo di e area di ex Bushiri ta cu e espacio hasta por wordo uza pa competencianan internacional di deporte. “E ta un bon oportunidad pa beach tennis, beach volleyball y beach soccer desaroya mas ainda na Aruba,” e mandatario a bisa.

Tambe e mandatario a expresa cu “pa nos ta importante cu awe pueblo ta cuminsa mira cu un decision importante cu Gobierno a tuma no a bay pa e banda di desaroyo economico/comercial pero pa crea mas espacio publico pa pueblo.” 

Expresionnan haci den e articulo aki no necesariamente ta refleha opinion di ArenaPoliti.co