Parlamentario mr. Xiomara Maduro (MEP): Gobierno mes a manda señal cu criminalidad ta wordo tolera na nos Pais
E siman aki Parlamento tabata tin un ecuentro cu Minister Dowers y ehecutivonan di Polis, Seguridad Nacional y Warda nos Costa riba criminalidad creciente na nos Pais. Nos Pueblo ta stik na man di criminalidad y hopi no ta sinta nan mes sigur mas den nan propio cas. Remarcabel y lamentabel ta cu e Gobierno aki di AVP mes a sinta manda e señal cu criminalidad ta wordo tolera na nos Pais y como consecuencia awe e criminalnan ta sinti cu nan por haci deshaci ya cu e propio Ministernan di Gabinete Eman ta tene man cu hendenan cu a comete actonan criminal grave of ta facilita ilegalidad cu despues ta perhudica nos Pueblo.
Zware jongens
Cu tanto informacion di inteligencia cu ta disponibel, toch nos a haya e Ministernan di Gabinete Eman ta tene man cu ‘zware jongens’ mandando un señal hopi robes na comunidad. Mira por ehempel nos Prome Minister Mike Eman cu a sali den prensa bon braza cu e Gobernador di La Guajira Kiko Gomez kende a wordo sentencia na 55 aña di prison pa actonan criminal di asesinato, narcotrafico y contrabanda di arma. Hunto cu Kiko, Minister Eman kier a haci negoshi di pasa fruta bou di inmunidad diplomatico via Aruba pa Europa. Ta ki señal drechi Eman por a manda asina aki? Pa no lubida Roberto Rincon acusa di soborno den PdVSA cu kende De Meza a sali riba potret den restaurant y di kende nos a compronde lo a sponser Minister Eman tambe den campania electoral 2013. Ta ki señal drechi De Meza y Eman a manda ey? Mas cu claro nos ex Minister di Turismo cu su amistad Ospino cu den dia cla ta tira atraco na joheria y despues como supuesto empresario ta haya 11 mil dollar di Pueblo via Banco Central pa un negoshi di strawberry cu nunca a opera. Y ainda falta e ‘zware jongens’ cu ta rondona Ministernan Sevinger y Croes cu por haci deshaci cu permiso na nos Pais sin consecuencia alguno.
Actitud moli moli di Dowers
Tristo den tur esaki ta cu e Minister di Husticia Dowers ta consenti tur e tenemento di man aki cu ‘zware jongens’ di su colega Ministernan. Pasobra si Minister Dowers tabata duro di berdad, nunca e señal robesnan aki por a bay den comunidad. Y ora nos a confronte cu e hechonan aki, Minister Dowers kier core pa su responsabilidad bisando cu e no sa di nada of pa nos bay puntra e Ministernan concerni. E actitud di moli moli aki di Minister Dowers ta manda e señal cu den e grandinan mes criminalidad ta bon tolera pues e chikitonan no mester ta mihor.
Cambia rumbo
Pa pone paro na criminalidad, nos Gobernantenan mester manda e señal corecto. E cuenta di tene man y complace cu criminal mester caba. MEP den Gobierno lo cambia e rumbo di nos Pais pa nos bay bek riba e caminda na unda cu ta prevalece integridad den gobernacion y cu e señal ta wordo manda cu criminalidad no ta wordo tolera y tampoco fomenta pa esnan cu mester duna ehempel den comunidad.
7 februari 2017
Expresionnan haci den e articulo aki no necesariamente ta refleha opinion di ArenaPoliti.co