Ministernan Eman, Croes y de Meza hunto cu gerencia di CITGO a yama bon bini na contratistanan local      
Caranan contento den Refineria di CITGO Aruba ta marca un comienso nobo!      

ORANJESTAD – Durante un ceremonia diabierna mainta na San Nicolas, a toca honor na Prome Minister Mike Eman y Ministernan Mike de Meza y Paul Croes pa haci entrega di mas un cantidad grandi di badge na e prome grupo di trahadonan di contractistanan local cu a cuminsa cu e trabou pa rehabilita e refineria di Aruba.

Ta trata di empleadonan di contratistanan grandi local cu hopi experiencia den refineria na Aruba: Oduber Contractors, PWEC, Doushar y Goedecke. Por a sinti cu tabata reina un alegria grandi bou di e trahadonan cu a ricibi, oficialmente, nan 'badge' cu ta permiti nan move den e instalacionnan di e refineria. “Esaki ta un dia hopi special,” tabata palabranan expresa pa Prome Minister Eman, pero un sentimento expresa tambe pa su coleganan Minister de Meza, Croes y tambe empleadonan di contratistanan presente como tambe representantenan di gerencia di CITGO.

E mainta a wordo habri oficialmente door di Alirio Zambrano, Refinery Project Director di CITGO, kende a bisa cu “ta un gran placer cu nos ta ricibi boso tur awe den nos cas, specialmente den e edificio aki cu ta e prome cu nos a pone den funcion y hopi mas lo sigui mientras cu e trabounan ta sigui avansa.” Palabranan di elogio Zambrano tabatin pa e proyecto di pone e refineria den funcion y tabata agradecido cu e mandatarionan a acepta e invitacion pa comparti cu CITGO otro 'milestone' den e proyecto. “Ta bay tin mas 'milestone' na caminda,” el a enfatisa cu hopi alegria.

E mainta aki a keda presenta tambe top di e team di management di Citgo Aruba; sr. Ray Buckley, Danny Hannigan y Ed Oduber.

“Esaki ta un placer un satisfaccion pasobra no solamente nos a firma un acuerdo algun luna atras pa reapertura pero awe nos ta pone cara na esaki," Prome Minister Mike Eman a bisa e trahadornan presente. "Y e ta e momento cu nos a spera riba dje," y el a enfatisa cu, "E contenido di e papelnan tabata bunita, y nan cantidad grandi, pero en realidad loke ta importante den henter e proceso aki ta cu e cuponan di trabou pa nos hendenan, bienestar pa nos hendenan y un futuro prospero pa Aruba.”

Prome Minister a señala cu e tin hopi confiansa den e trabou cu ta bay cuminsa, mirando e companianan envolvi y conoci pa nan experticio den e sector aki. Sr. Eman a recorda tambe cu den e grupo cu a ricibi nan badge tin hopi cara familiar cu operacion di e refineria. E mandatario a pidi aplauso pa e companianan envolvi y nan empleadonan y naturalmente a gradici CITGO pa e confiansa demostra den Aruba. Pa finalisa Eman a pidi un “standing ovation” pa Minister ing. Mike de Meza kende a hinca hopi esfuerso den reapertura di e refineria hunto cu su colega Minister Paul Croes. “Pa nos esaki ta un momento yena di emocion."

Awor cu a cuminsa cu rehabilitacion di e facilidad petrolero, por spera cu den poco tempo ta acelera e proceso di tuma mas hende na trabou pa por completa e trabou grandi aki. 

Expresionnan haci den e articulo aki no necesariamente ta refleha opinion di ArenaPoliti.co