Durante e reunion tocante e ley di CITGO segun parlamentario di MEP mr. Juan Ady Thijsen partido MEP a entrega varios mocion y amienda. Un di e amiendanan tabata pa crea un fondo pa trahadornan di refineria. E summa lo tabata pa 10 million florin probeniente di e summa di arreglo cu mester bai pa gobierno y lo a ser maneha pa Banco Central di Aruba. Tambe a amenda cu pa haci uso di e fondo mester tabata tin dos tercera parti di voto den parlamento. E meta tras di e amienda aki tabata pa proteha trahadornan den e sector di refineria cu awor ta bai over den e diferente companianan cu ta ser lanta den cuadra di e ley di CITGO. Manera conoci aunque leynan local ta proteha derechonan di trahadornan hopi biaha toch ta surgi problemanan inespera den e sector aki. Asina ta fresco den memoria e accion di ex trahadornan di Valero " si tin pa Valero, tin pa nos". Parlamentario di MEP mr. Juan Ady Thijsen ta lamenta cu partido AVP ta escohe e caminda pa vota contra tur proposicion di MEP, mientras MEP si ta evalua cada mocion y amienda riba nan merito. Segun parlamentario mr. Juan Ady Thijsen no ta prome biaha cu AVP ta laga trahadornan di refineria na caya. Na 2010 tambe partido AVP a vota contra un proposicion di partido MEP pa crea un fondo pa trahadornan tempo di e Settlement Agreement. Pues segun parlamentario mr. Juan Ady Thijsen ayera a keda demostra un biaha mas cu AVP ta contra e clase trahador.

Expresionnan haci den e articulo aki no necesariamente ta refleha opinion di ArenaPoliti.co