Gabinete ME II: A firma ley di reapertura di refineria di Aruba na San Nicolas
Prome Minister y Minister di Infrastructura inspeccionando sistema di drenahe rond di Aruba.
ORANJESTAD - Diahuebs mainta Prome Minister Mike Eman y su colega Minister encarga cu, entre otro e cartera di, Infrastructura Benny Sevinger tabata rond di Aruba cu funcionarionan di DOW inspeccionando diferente sistema di drenahe. Esaki debi na e tempestad cu tabata na caminda, Matthew. Hunto cu e funccionarionan di DOW, cu tabata duna splicacion detaya di cada sistema y con nan ta traha, a pasa entre otro na Madiki, Bushiri, Pos Abou, Palm Beach, Pos Chiquito y Zeewijk.
Despues cu ley pa reapertura di refineria di Aruba a keda aproba den Parlamento, e ta bay na Gobernador di Aruba pa wordo firma y finalmente ministernan mester firma esaki. Pero mirando cu Ministernan Eman y Sevinger tabata inspeccionando varios luga, for di bestuurskantoor, a sali cu e documentonan pa localisa ministernan Eman y Sevinger cu falta pa firma, pa asina oficialisa e ley. Pa puro casualidad, a logra haya e dos ministernan net ora nan ta na Zeewijk y ey mes a firma e documentonan. Riba e combinacion di potretnan por mira e ministernan ta firma y e tankinan di Valero den bario di Zeewijk, districto di San Nicolas, cu pa prome di october ta bira propiedad tambe di Pais Aruba.
Cu e ley pa reapertura di e refineria confirma, entre otro, Aruba a bira doño di su mesun refineria despues di mas di 90 aña di actividad petrolero na Aruba, un pilar economico y historico di Pais Aruba. Aruba ta bay lease CITGO Petroleum Corporation e refineria pa opera esaki.
Expresionnan haci den e articulo aki no necesariamente ta refleha opinion di ArenaPoliti.co