Den cuadro di e Caribbean Energy Security Summit, Minister Mike de Meza a reuni cu representantenan di Ministerio di  Energia di Merca, kendenan a expresa nan admiracion pa loke ta haciendo riba tereno di energia sostenibel na Aruba. Merca ta comprometi pa pone Aruba riba prome plano, no solamente den Caribe, pero mundialmente. “Tabata impresionante y ta un momento di orguyo y satisfaccion pa tende Vice-Presidente Biden comparti cu tur presente su admiracion pa e pasonan cu Aruba ta tumando,” Minister de Meza encarga cu Asuntonan Economico y Energia a declara. Vice Presidente Americano, Joe Biden, a trece hunto 36 delegacion na e capital mericano. Lidernan di paisnan Caribense y delegadonan di entre otro gobierno Mericano y Nacionnan Uni a reuni pa dialoga tocante e retonan cu cambio di clima ta causando y por trece pa e region.

Colaboracion entre paisnan den region, como tambe aporte di cada pais pa atende e tema climatico y participacion mutuo pa yega na un acuerdo global, tabata temanan central durante e cumbre cu ta tuma lugar e siman aki. “Aruba a ricibi hopi atencion durante di Caribbean Energy Security Summit cu ta tumando luga aki na Washington”, Minister de Meza a sigui bisa. E escogencia cu gobierno di Aruba a haci, di pone un meta firme pa yega na 100% independencia di fuentenan di energia convencional pa produccion di awa y coriente, a ricibi hopi interes. “Paisnan den Caribe ta interesa den locual cu Aruba ta haciendo y a crea relacionnan nobo pa nos isla durante di e dialogonan positivo.”

“Delegadonan di nos region a expresa admiracion pa Aruba, e pasonan cu Aruba ta tumando y ta interesa pa traha hunto cu nos isla riba e parti di sostenibilidad y energia alternativo,” Minister de Meza a expresa. Eventonan asina ta brinda Aruba un plataforma tambe pa yega na conocemento pa realiza su agenda energetico. Minister de Meza a remarca, “Mi ta orguyoso di e vision cu nos ta eherciendo na Aruba, e pasonan y maneho total di energia. Locual cu ta pasa na nivel mundial door di recursonan fossiel, tin cambio den esaki y tur persona ta convenci cu e direccion cu Aruba ta tumando ta e direccion general cu paisnan rond di mundo mester tuma. Nos bishita tabata sumamente interesante y tambe positivo pa Aruba.”

Pa fin di otro aña Aruba ta yegando e punto unda cu 50% di produccion di awa y coriente no lo depende mas di crudo. Como un isla chikito nos no por logra e transicion completo, esta pa yega 100% nos so y ta sumamente necesario pa nos ta afilia na plataformanan internacional y partnernan strategico regional y internacional pa asisti nos den yega nos metanan. Reunionnan manera e cumbre organisa pa Vice-Presidente Biden y participacion na iniciativanan manera e “10 Island Challenge” di Carbon War Room ta hunga un rol esencial den e vision y plannan pa nos isla realisa e meta “Aruba 2020”, Minister Mike de Meza a subraya. Aruba ta riba bon caminda, pero nos trabao no ta facil y falta ainda mas intervencionnan importante pa nos por realisa un Aruba mas limpi, mas sostenibel y mas independiente di fuentenan di energia fossiel cual no ta sostenibel y, ademas, cu ta causa daño na medio ambiente.

Expresionnan haci den e articulo aki no necesariamente ta refleha opinion di ArenaPoliti.co